સ્થાનિક સ્વરાજયની ચૂંટણી:મોરબી જિલ્લાની ત્રણ પાલિકામાં 104 બેઠક માટે 1,90,794 મતદારો કરશે મતાધિકારનો ઉપયોગ

મોરબી જિલ્લાની સ્થાનિક સ્વરાજયની ચૂંટણીને હવે ગણતરીના દિવસ બાકી રહ્યા છે. તમામ સ્વરાજ્ય સંસ્થાઓના ઉમેદવારોનું ચિત્ર પણ હવે સ્પષ્ટ થઈ ગયું છે.બીજી તરફ જિલ્લા ચૂંટણી તંત્ર દ્વારા પણ મતદારોની સંખ્યા મુજબ મતદાર યાદીની કાપલીઓ તૈયાર કરી રહ્યું છે. બીજી તરફ આ સમગ્ર કસરતના કેન્દ્રમાં રહેલા મતદારો કોને મત આપવા કયા ઉમેદવાર કેટલો સાચો છે અને ક્યો ખોટો તેની ચકાસણીમાં લાગી રહ્યો છે.હવે પણ પોતાના પસંદગીના ઉમેદવારને ચૂંટતા પહેલા તેની બેકગ્રાઉન્ડ સ્થિતિ ચકાસી રહ્યા છે.

ગત ચૂંટણીમાં જે ઉમેદવાર વિજેતા બન્યો હતો તો તેને શું કામગીરી કરી, કેટલી કામગીરી માં માત્ર વચનો જ રહ્યા તે જાણે છે તેનો ક્યાસ કાઢી રહ્યો છે. મોરબી જિલ્લામાં આ વખતે 3 નગરપાલિકા 5 તાલૂકા પંચાયત અને જિલ્લા પંચાયતનું આગામી 28મીના રોજ મતદાન યોજાવાનું છે. ત્યારે મોરબી જિલ્લામાં સૌથી વધુ નજર ત્રણ નગરપાલિકામા રહેશે, જેમાં મોરબી પાલિકાની ચૂંટણી રસપ્રદ રહેશે.

મોરબી જિલ્લામાં આ ત્રણેય પાલિકામાં મતદારોને સ્થિતિ જોઈએ તો કુલ 1,90,794 મતદારો નોંધાયેલા છે. જેમાં સૌથી વધુ મોરબી પાલિકામાં 1,50,653 વાંકાનેરમાં 30,113,જ્યારે માળીયા 10,028 મતદાર નોંધાયા છે.જેન્ડર મુજબ જોઈએ તો 99,200 પુરુષ મતદાર સામે 91,594 સ્ત્રી મતદારો નોધાયા હતા.

પાલિકાની મતદારયાદીમાંથી શનાળા, અમરેલી ગ્રામ પંચાયતના મતદાર બાકાત, 2017માં જ ફરી ગ્રામ પંચાયત ફાળવી દેવાઇ
મોરબી નગરપાલિકાની 2015ની ચૂંટણી વખતે અમરેલી ગ્રામ પંચાયત અને શનાળા ગ્રામ પંચાયતને પાલિકા વિસ્તારમાં ભેળવવામાં આવ્યા હતા. જો કે મતદારોને પાલિકા વિસ્તાર માફક ન આવતા ફરીથી ગ્રામ પંચાયત આપવા માંગણી કરી હતી અને પાલિકા ચૂંટણી, 2017 વિધાનસભા ચૂંટણી અને લોકસભાની ચૂંટણી વખતે મતદાન બહિષ્કાર કર્યા હતો. જે બાદ ફરીથી ગ્રામ પંચાયત આપી દેતા અંદાજીત 5000થી વધુ મતદારોને મતદારયાદીમાં બાકાત કરી દેવાયા હતા.

ત્રણેય પાલિકામાં 5 વર્ષમાં 14,579 મતદાર વધ્યા
મોરબી જિલ્લાની મહત્વની ત્રણ નગરપાલિકામાં 2015માં કુલ1,76,215 મતદારો નોંધાયેલ હતા જે 2021માં વધીને 1,90,794 મતદારો થયા છે. આમ 5 વર્ષમાં કુલ 14,579 મતદારો વધ્યા છે.નગરપાલિકા મુજબ જોઈએ તો મોરબી પાલિકામાં 5 વર્ષ દરમિયાન 10,726,વાંકાનેર પાલિકામાં 304 જ્યારે માળીયામાં 807 મતદારમાં વધારો નોંધાયો હતો.

મોરબી નગરપાલિકામાં ગત ચૂંટણીમાં કોંગ્રેસને મળી હતી સ્પષ્ટ બહુમતી
મોરબી પાલિકાની 13 વોર્ડની 72 બેઠકમાંથી કોંગ્રેસે 32 પર અને ભાજપે 20 સીટ પર કબજો જમાવ્યો હતો અને કોંગ્રેસને સ્પષ્ટ બહુમતી મળી ગઇ હતી. જિલ્લા અને તાલુકા પંચાયતમાં પણ પંજાએ કમળનું નામો નિશાન રહેવા દીધું ન હતું. પાટીદાર શાસીત વોર્ડમાં ભાજપનો રકાશ થયો હતો. જે-તે સમયે અસંતુષ્ટ કોંગ્રેસી આગેવાનોએ માત્ર સત્તા હાંસલ કરવા માટે અલગ નાગરીક સમિતિનું ગઠન કરી બાદમાં ભાજપ સાથે સાંઠગાંઠ ચલાવી શાસન મેળવ્યું હતું. જોવાનું એ રહે છે કે, આ વખતની ચૂંટણીમાં ક્યા પક્ષનું ક્યું કાર્ડ ચાલી જાય છે અને મતદારોનો ઝુકાવ કઇ તરફ ઢળે છે.

માળિયા મિયાણા પાલિકા વોર્ડ મુજબ મતદાર

મોરબીમાં વોર્ડ વાઇઝ મતદારોની સંખ્યા

મોરબી જિલ્લા પંચાયતની 24 બેઠક પર નોંધાયા છે 5,24,555 મતદારો