દુર્ઘટના:હળવદમાં બાઇકચાલક પતંગની દોરીથી ઘાયલ, 1 ઇંચ દોરી બેસી જતાં સારવાર હેઠળ, નાક અને પાંપણ પર 6 ટાંકા લેવા પડ્યાં

હળવદ-સરા રોડ ઉપર આવેલા રૂદ્ર ટાઉનશીપ પાસે હળવદથી સાપકડા ગામે આધેડ બાઇક લઇને ‌જતા હતાં. આ દરમિયાન રોડ પરથી પતંગની દોરીના કારણે નાક, પાંપણ સહિતના ભાગે ઇજા થતા 6 જેટલા ટાંકા લઇને સારવાર આપી રજા આપી હતી. સાપકડા ગામના 50 વર્ષના મનુભાઈ ઉર્ફે પ્રભુભાઈ લવજીભાઈ ચૌહાણ હળવદમાં કોઇ કામ અર્થે બાઇક લઈને આવ્યા હતા. ત્યારે સાપકડા ગામે પરત ફરતા હળવદના રૂદ્ર પાર્ક ટાઉનશિપ પાસે રોડ પર એકાએક નાક, પાંપણ સહિતના ભાગે પતંગની દોરી ધસી ગઇ હતી.

જેમાં નાકના ભાગે એક ઇંચ જેટલી ઉંડી દોરી બેસી જતા લોહીની ધાર વહેવા લાગી હતી. આથી આજુબાજુના લોકો ઘટનાસ્થળે દોડીને ગંભીર હાલતમાં મનુભાઈ ચૌહાણને ખાનગી હોસ્પિટલમાં સારવાર માટે લઈ ગયા હતા. ત્યારે ખાનગી હોસ્પિટલના તબીબે નાક, આંખ સહિતના ભાગે 6 જેટલા ટાંકા લઈને સારવાર દરમિયાન રજા આપ્યા બાદ પોતાના ઘર સાપકડા ગામે જવા રવાના થયા હતાં.