કાર્યવાહી:હળવદ પંથકમાંથી જુગાર રમતાં 3 ઝબ્બે, 2 ફરાર, રૂ.3500 ઉપરાંતનો મુદ્દામાલ જપ્ત

હળવદ પોલીસે પેટ્રોલીંગ દરમિયાન જુગાર અંગે દરોડા કર્યા હતા. જેમાં શહેરના પંચમુખી ઢોરા વિસ્તારમાં જુગાર રમતો એક શખ્સ ઝડપાયો હતો. જ્યારે અન્ય એક દરોડામાં સાપકડા ગામે જુગાર રમતા બે શખ્સો ઝડપાયા જ્યારે બે શખ્સો ફરાર થઇ ગયા હતા. હળવદ શહેર તથા ગ્રામ્ય વિસ્તારોમાં વધતી જુગારની બદીને અટકાવવા કાર્યવાહી હાથ ધરી હતી. જેના પેટ્રોલીંગ દરમિયાન મળેલ બાતમીના આધારે હળવદ શહેરના પંચમુખી ઢોરે મહાદેવ મંદિર પાસે દરોડો કર્યો હતો. જ્યાં જાહેરમાં વરલીનો જુગાર રમતા નીતેશ મનસુખભાઇ કોળી રહે હળવદ ભવાનીનગર ઢોરાવિસ્તારને ઝડપી પાડી રોકડ સહિત રૂ.232નો મુદ્દામાલ જપ્ત કર્યો હતો.

જ્યારે અન્ય એક દરોડામાં તાલુકાના સાપકડા ગામે શિવ મંદિર બાજુમાં તળાવની પાળ પાસે જાહેરમાં જુગાર રમાતો હોવાની બાતમીને આધારે પોલીસે દરોડો કર્યો હતો. જ્યાં પોલીસને જોઇ નાસભાગ મચી જવા પામી હતી. દરોડા સ્થળ પરથી ભાસ્કર અરવિંદભાઈ નિમ્બાર્ક અને ગલાભાઈ મંગાભાઈ ચૌહાણ એમ બે શખ્સો ઝડપી લઈને રોકડ રકમ રૂ.3540 જપ્ત કરી છે. આ દરોડા દરમિયાન આરોપી કિલો સુરેશ નાડીયા અને પ્રહલાદભાઈ મુકેશભાઈ નાડીયા રહે બંને સાપકડા વાળા નાસી છુટતા બંનેને પકડવાના ચક્રો ગતિમાન કર્યા છે.