અકસ્માત:બાઇક અને ટ્રેક્ટર ટકરાતાં બાઇકચાલકનું ઘટનાસ્થળે મોત

શામળાજીના પાલ્લા પાસે ટ્રેક્ટર અને બાઇક ટકરાતાં બાઇકચાલકનું ઘટનાસ્થળે મોત થતાં ચકચાર મચી જવા પામી હતી. આ અંગે પોલીસે અકસ્માતે મોતનો ગુનો નોંધી તપાસ હાથ ધરી હતી. મૃતકના ચૂંટણીકાર્ડના આધારે તે ભાણમેર ગામનો હોવાનું તપાસમાં બહાર અાવ્યું હતું. શામળાજી નજીક પાલ્લા પાસે ભિલોડા તરફ જઇ રહેલા ટ્રેક્ટર અને શામળાજી તરફ આવી રહેલા બાઇક ટકરાતાં બાઇકચાલકને માથાના ભાગે ગંભીર ઇજાઓ થતા યુવકનું ઘટનાસ્થળે જ મોત નિપજ્યું હતું.

સમગ્ર મામલે શામળાજી પોલીસ ઘટના સ્થળે પહોંચી મામલે મૃતકને પોસ્ટ મોર્ટમ માટે મોકલી આપી હતી. સમગ્ર ઘટના માટે પોલીસે અકસ્માતે ગુનો નોંધી આગળની કાર્યવાહી હાથ ધરી હતી. યુવકની બેગમાંથી મળી આવેલા ચૂંટણી કાર્ડ પરથી બાઇક સવારની ઓળખ થઈ હતી. મૃતકનું નામ જીગ્નેશભાઈ અશોકભાઈ નિનામા ભાણમેર ગામના વતની હોવાનું બહાર આવ્યું હતું.