હાલાકી:શામળાજીમાં હાઈવે પર ટ્રક ખોટકાતાં પાંચ કિમી લાંબી વાહનોની લાઇન લાગી

અમદાવાદ ઉદેપુર નેશનલ હાઇવે 8 નું 6 લેન બનાવવાની કામગીરી ચાલુ છે. ત્યારે એક બાજુ રોડ પર બંને તરફના વાહન વ્યવહાર ચાલે છે. ત્યારે રાત્રે બે વાગ્યે રાજસ્થાન તરફથી આવતો ટ્રક ખોટકાતા પાંચ કિલોમીટર લાંબી વાહનોની લાઈનો લાગી હતી. લાંબી લાઈનો લાગતાં વાહનોની અવરજવર ઠપ થઈ ગઈ હતી.

ત્યારે ભારે વાહનો તથા ખાનગી વાહન ઈમરજન્સી જેવા વાહનો પણ ટ્રાફિક જામમાં ફસાયા હતા. અંતે સ્થાનિક પોલીસની મદદથી બપોરના બે વાગ્યે ટ્રાફિક હળવો કરાયો હતો. હાઈવે તંત્રના યોગ્ય આયોજનના અભાવથી વાહનચાલકો પરેશાનીનો સામનો કરે છે. ત્યારે શામળાજી બસ સ્ટેશનથી વાહનચાલકો સાંકડા રોડ પર અડોઅડ ચલાવતા રાહદારીઓને નીકળવું પણ મુશ્કેલ બને છે.વારંવાર રજૂઆત કરવા છતાં પણ હાઈવે વિભાગ દ્વારા આંખ આડા કાન કરાય છે. હાઈવે વિભાગ દ્વારા યોગ્ય પગલાં ભરવામાં આવે તેવી લોક માંગ ઉઠી છે.