વિવાદ:બાંધકામ કરવાના મુદ્દે બે પરિવારો ઝઘડતા વૃદ્ધના બે દાંત પાડી નાખ્યા, મોડાસાના ટીંટોઈમાં મહિલાએ ચાર વિરુદ્ધ ફરિયાદ નોંધાવી

મોડાસાના ટીંટોઈમાં ખુલ્લી જમીનમાં માલિકીના પ્રશ્ને છેલ્લા કેટલાય સમયથી કોર્ટમાં કેસ ચાલી રહ્યો હોવા છતાં આ જમીન પર બાંધકામ શરૂ કરાવતા બે પટેલ પરિવારો વચ્ચે કજિયો થતાં વૃદ્ધના ઝડબાના ભાગે મૂક્કો મારી બે દાંત પાડી નાખતાં મહિલાએ મોડાસા રૂરલ પોલીસ સ્ટેશનમાં 4 સામે ફરિયાદ નોંધાવી છે.

ટીંટોઈમાં ધવલભાઇ મનુભાઈ પટેલ તેમના ઘર સામે આવેલ ખુલ્લી જમીનમાં મજૂરો પાસે બાંધકામ શરૂ કરતાં તેના પડોશમાં આવેલા પટેલ પરિવારે ત્યાં આગળ બાંધકામ ન કરવા તેમજ ગ્રામજનો પણ આ જગ્યા પર બાંધકામ ન કરવા જણાવ્યું હોવા છતાં બાંધકામ શરૂ કરવાનું ના કહેતા કેશાભાઈ કચરાભાઈ પટેલ (79) ઉપર ધવલભાઇ મનુભાઈ પટેલ ઉશ્કેરાઈ જઈ તેમને મોઢાના ભાગે મૂક્કો મારીને બે દાંત પાડી નાખીને તેમને તથા તેમના પરિવારને જાનથી મારી નાખવાની ધમકી આપતાં ઝઘડામાં ઈજાગ્રસ્ત બનેલા આધેડને લોહીલુહાણ હાલતમાં મોડાસા સારવાર માટે ખસેડ્યા હતા. મધુબેન કેશાભાઈ પટેલે ધવલભાઇ મનુભાઈ પટેલ, ભરતભાઈ મનુભાઈ પટેલ, ભાવેશભાઈ ભાલચંદભાઈ પટેલ અને મનુભાઈ વિરસંગભાઈ પટેલ સામે ફરિયાદ નોંધાવી છે.