નુકસાનની દહેશત:અરવલ્લી જિલ્લામાં ચણામાં લીલીઈયળ અને જીવાતના ઉપદ્રવથી ખેડૂતો પરેશાન

અરવલ્લી જિલ્લામાં સિઝનમાં પ્રથમવાર 15હજાર હેક્ટરકરતાં વધુ જમીનમાં ચણાની ખેડૂતોએ વાવણી કરી છે. પરંતુ છેલ્લા એક સપ્તાહથી ચણામાં લીલી ઇયળ અને મશીનામની જીવાતનો ઉપદ્રવ વધતાં ખેડૂતો હેરાન પરેશાન થઇ ગયા છે બીજી બાજુ વાદળછાયુ વાતાવરણ રહેવાના કારણે ચણામાં વિપરીત અસર પડતાં ચણાનું ઉત્પાદન ઘટવાની ખેડૂતોએ શંકા વ્યક્ત કરી હતી.

જિલ્લામાં સૌથી વધુ ચણાનું વાવેતર માલપુર તાલુકામાં થાય છે. ત્યારબાદ મોડાસા, ભિલોડા અને મેઘરજ તાલુકાના અંતરિયાળ વિસ્તારોમાં પાણીની અછત હોવાના કારણે અને બજારમાં ઊંચો ભાવ મળવાની આશા થી ખેડૂતોએ શિયાળુ સિઝન દરમિયાન ચણાની વાવણી પર પસંદગી ઉતારતા જિલ્લામાં પ્રથમવાર 15 હજાર હેક્ટરથી વધુમાં ચણાની વાવણી થઈ છે. સૌથી વધુ ગુલાબી ચણા ની વાવણી માલપુર તાલુકામાં થઈ છે. ગત માસમાં સતત ત્રણ વાર કમોસમી માવઠુ થતા અને વાદળછાયુ વાતાવરણ રહેવાના કારણે ચણા પર માઠી અસર પડી છે. તદુપરાંત ચણાના પાકમાં ફૂલ અને પોપટા આવવાના સમયે છેલ્લા એક સપ્તાહ ઉપરાંતના સમયથી લીલીઇયળનો ઉપદ્રવ વધતાં ખેડૂતો પાકને બચાવવા માટે બજારમાંથી મોંઘા ભાવે જંતુનાશક દવાઓની ખરીદી કરીને દવાનો છંટકાવ શરૂ કર્યો છે.