ધરપકડ:અરવલ્લી LCBએ 4 વર્ષથી ફરાર બે આરોપીને પકડ્યા, દારૂનો અને અપહરણનો આરોપી પકડ્યો

અરવલ્લી જિલ્લા એલસીબીના અપહરણ કેસનો આરોપી અને શામળાજી તેમજ હિંમતનગર બી ડિવિઝનના વિદેશી દારૂની હેરાફેરીમાં સંડોવાયેલા આરોપીને શામળાજી આશ્રમ પાસેથી ઝડપી લીધા હતા. ઉપરોક્ત બંને આરોપીઓ પોલીસને થાપ આપીને ચાર વર્ષથી નાસતા ફરતા હતા.અરવલ્લી એલસીબીના એએસઆઇ મોહનસિંહ અને હેડ કોન્સ્ટેબલ નરેન્દ્રસિંહ પેટ્રોલિંગમાં હતા તે દરમિયાન ચાર વર્ષ અગાઉ પોલીસ સ્ટેશન વિસ્તારમાં મહિલાનું અપહરણ કરતા બાયડના વારેણાનો જયદિપસિંહ ઉર્ફે જયેશ ફતેસિંહ ડાભી મોડાસા આવવાનો હોવાની બાતમી મળતાં એલસીબીએ આરોપીને તેમજ અપહરણ નો ભોગ બનનાર મહિલાને મોડાસા બસ સ્ટેશન ખાતેથી બંનેને ઝડપી પોલીસને સોંપવા તજવીજ હાથ ધરી હતી.

શામળાજીમાં એલસીબીના સ્ટાફે પેટ્રોલિંગમાં દરમિયાન બાતમી મળી હતી કે શામળાજી પોલીસ સ્ટેશનમાં તેમજ હિંમતનગર બી ડિવિઝન વિસ્તારમાં ચાર વર્ષ અગાઉ વિદેશી દારૂની હેરાફેરીમાં સંડોવાયેલો વોન્ટેડ આરોપી બંસીલાલ નેમાભાઈ ખરાડી રહે ઉખેડીતા. ખેરવાડા જિલ્લો ઉદેપુર વાળો શામળાજી આવવાનો હોવાની બાતમી મળતા પોલીસે શામળાજી આશ્રમ ચોકડીથી વોચ ગોઠવી ઝડપી લીધો હતો.