તસ્કરી:મોડાસામાં સાડીની દુકાનમાંથી શિક્ષિકાના 80 હજાર ભરેલ પાકીટની તફડંચીથી ચકચાર

ભિલોડાની લસુડીયા હાઈસ્કૂલમાં ફરજ બજાવતા શિક્ષિકા અને તેમના પતિ તેમના મામાના દીકરાના લગ્ન હોવાથી ખરીદી માટે મોડાસા આવ્યા હતા. દરમિયાન સાડીની દુકાનમાંથી ખરીદી કરતા સમયે ગઠિયો શિક્ષિકાની નજર ચૂકવીને રોકડ રૂ. 80 હજાર ભરેલું પાકીટ ધોળેદિવસે તફડાવી જતાં ચકચાર મચી ગઇ હતી. શિક્ષિકાના પાકીટમાં મોબાઈલ સહિતના કિંમતી દસ્તાવેજો ચોરાઈ જતાં તેમણે મોડાસા ટાઉન પોલીસ સ્ટેશનમાં ગઠિયા વિરુદ્ધ ફરિયાદ નોંધાવી હતી

ભિલોડાના મોટા કંથારીયામાં રહેતા અને લસુડીયા હાઇસ્કૂલના શિક્ષિકા મણીબેન અહારી અને તેમના પતિ રાજેન્દ્ર ભાઈ મામાના દીકરાના લગ્ન હોવાથી મોડાસા ખરીદી માટે આવ્યા હતા. મોડાસા ઉમિયા ટાઉનશીપમાં પોતાના મકાનમાં જમી પરવારીને દંપતી મોડાસાની બેંક ઓફ બરોડામાંથી 50 હજાર ઉપાડીને કાપડની ખરીદી કરવા મોડાસામાં ભાગ્યલક્ષ્મી સાડીની દુકાનમાં ખરીદી માટે પહોંચ્યા હતા

દરમિયાન શિક્ષિકાએ પોતાના પાસે રહેલું પાકિટ બાજુ પર મૂકીને પતિ પત્ની બંને કપડાની પસંદગી કરવા લાગ્યા હતા અને ખરીદી કર્યા બાદ વેપારીને ચૂકવણું કરવાના સમયે બાજુમાં મૂકેલું પાકીટ ન દેખાતા હાંફળા-ફાંફળા બનીને પાકીટ ની શોધખોળ હાથ ધરી હતી. પરંતુ બેંકમાંથી ઉપાડેલા રૂપિયા પચાસ હજાર તેમજ શિક્ષિકાના પર્સમાં રહેલા રૂ.30 હજાર સહિત મોબાઇલ સહિતના દસ્તાવેજો સહિત કુલ રૂ. 84000 ની અજાણ્યો ગઠિયો નજર ચૂકવીને પાકિટ ઉઠાવી જતાં મણીબેને મોડાસા ટાઉન પોલીસમાં ફરિયાદ નોંધાવી છે.