મુશ્કેલી:વિસનગરમાં ત્રણ દરવાજાથી પટેલવાડી તરફ જતો રોડ ચૂંટણી સુધી નવો નહીં બને

વિસનગર શહેરના ત્રણ દરવાજા ટાવરથી સવાલા તરફ જતા રોડ ઉપર છેલ્લા કેટલાય સમયથી પડેલા ખાડાને કારણે વાહનચાલકો મુશ્કેલી વેઠી રહ્યા છે. સવાલા દરવાથી એમ.એન. કોલેજ રોડ બની ગયો, પણ આ નવીન રોડ ક્યારે બનશે તેને લઇ ચર્ચા જાગી છે. પાલિકાના સૂત્રોએ વર્કઓર્ડર આપવાનો બાકી હોવાનું જણાવ્યું હતું.

શહેરના અલગ અલગ વિસ્તારોમાં પડેલા ખાડાઓનું સમારકામ કરી નવીન રોડ બનાવાયા છે. જ્યારે ત્રણ દરવાજા ટાવરથી સવાલા તરફ જતા રોડ છેલ્લા ઘણા સમયથી ખાડાખૈયા વાળો છે. આ મુદ્દે પાલિકામાં અનેક રજૂઆતો પણ થઇ છે. શહેરીજનોના જણાવ્યા પ્રમાણે, શહેરનો સૌથી વધુ વાહનો પસાર થતો આ રોડ જ બાકી રાખ્યો છે, જે નવીન રોડ બનવો જોઇએ. આ અંગે પાલિકાના સૂત્રોએ જણાવ્યું કે, ગાૈરવપથથી ત્રણ દરવાજા તેમજ સવાલા દરવાજા તરફ જતા રોડના ટેન્ડર મંજૂર કરી દેવાયા છે. પરંતુ ચૂંટણી આચારસંહિતા આવતાં વર્કઓર્ડર આપવાનો બાકી છે. ચૂંટણી પૂરી થયા બાદ તાકીદે કામગીરી શરૂ કરી દેવાશે.