અકસ્માત:કુવાસણા પાટિયા નજીક મેટાડોરની ટક્કરે ગાડીચાલક શિક્ષકનું મોત

વિસનગર તાલુકાના કુવાસણા પાટિયા નજીક મેટાડોર ચાલકે વેગેનાર ગાડીને ટક્કર મારતાં સર્જાયેલા અકસ્માતમાં ગાડીચાલક રંગાકુઇ ગામના શિક્ષકનું મોત થયું હતું. જે અંગે મેટાડોરચાલક સામે ફરિયાદ નોંધાઇ છે. રંગાકુઇ ગામના ચૌધરી વિમલભાઇ જીવણભાઇ બનાસકાંઠાના વડગામ તાલુકાના પીલુચા ગામમાં સીઆરસી તરીકે નોકરી કરતા હતા.

વિમલભાઇ સોમવાર સવારે રંગાકુઇથી વેગેનાર ગાડી (જીજે 01 એચએમ 0733) લઇ વિસનગર તરફ આવવા નીકળ્યા હતા, જેઓ કુવાસણા પાટિયા નજીકથી પસાર થઇ રહ્યા હતા, તે દરમિયાન મેટાડોર (જીજે 02 એક્ષ 2646)ના ચાલકે વેગેનાર ગાડીને ટક્કર મારતાં વિમલભાઇને ગંભીર ઇજા પહોંચી હતી. તેમને તાત્કાલિક સારવાર અર્થે ખસેડાયા હતા, પરંતુ તબીબે મૃત જાહેર કર્યા હતા. આ અકસ્માત અંગે ચૌધરી કિર્તીભાઇ વેલજીભાઇએ ફરિયાદ નોંધાવી હતી.