ઉલટુ ચિત્ર:વિસનગર પાલિકાની 36 બેઠકો માટે ભાજપમાં 240, કોંગ્રેસમાં 42 દાવેદારો

વર્ષ 2015માં પાટીદાર અનામત આંદોલનને લઇ વિસનગર પાલિકાની ચૂંટણીમાં ભાજપમાંથી કોઇ ચૂંટણી લડવા તૈયાર થતું ન હતું, જ્યારે આ વખતે 36 સીટો માટે 240 દાવેદારો લાઇનમાં છે. જ્યારે તાલુકા પંચાયતની 24 સીટો અને જિલ્લા પંચાયતની 5 સીટો માટે 170 દાવેદારો છે. હરીફ કોંગ્રેસમાં નગરપાલિકામાં 42, જ્યારે તાલુકા અને જિ.પંચાયતમાં 100 દાવેદારો હોવાનું સૂત્રોએ જણાવ્યું હતું.નગરપાલિકાના 9 વોર્ડની 36 સીટો માટે યોજાનારી ચૂંટણીમાં ભાજપમાંથી 240 દાવેદારોએ ટિકિટ માંગી હોઇ નિરીક્ષકો માટે પસંદગી કઠીન બની છે.

તો દાવેદારોએ પોતાની ટિકિટ પાક્કી કરાવવા લોબિંગ શરૂ કરી દીધું છે. જ્યારે કોંગ્રેસમાંથી 42 ઉમેદવારોએ દાવેદારી કરી હોવાનું અને પેનલ બનાવવાની કામગીરી ચાલુ હોવાનું શહેર કોંગ્રેસે જણાવ્યું છે. તો તાલુકા પંચાયતની 24 સીટો માટે 82 અને જિલ્લા પંચાયતની 5 સીટો માટે 18 મળી કુલ 100 દાવેદારો છે.

2015માં પાલિકા-પંચાયતમાં કોંગ્રેસની જીત થઇ હતી
વર્ષ 2015માં અનામત આંદોલનને લઇ નગરપાલિકાની 36 પૈકી ભાજપને ફક્ત 7 સીટો મળી હતી. જ્યારે વિકાસમંચને 17 અને કોંગ્રેસને 12 સીટો મળતાં કોંગ્રેસ અને વિકાસમંચના ગઠબંધને સત્તા સંભાળી હતી. જેમાં અઢી વર્ષની બીજી મુદતમાં સવા વર્ષ પૂર્વે 21 સભ્યો ભાજપમાં જોડાઇ જતાં ભાજપના હાથમાં સત્તા આવી હતી. જ્યારે તાલુકા પંચાયતમાં ભાજપને 5 અને કોંગ્રેસને 19 સીટો મળી હતી. જેમાં અઢી વર્ષ બાદ કોંગ્રેસના કેટલાક સભ્યો ભાજપમાં ભળતાં કોંગ્રેસે પ્રમુખપદ જાળવી રાખ્યું, પરંતુ કારોબારી સમિતિ અને સામાજિક ન્યાય સમિતિ ગુમાવી હતી.