વ્યવસ્થા:પ્રાંતિજ પોલીસે ચાલતાં યુપી જતાં 18 પરપ્રાંતિય મજૂરોને ક્વોરન્ટાઇન કર્યા

પ્રાંતિજ નેશનલ હાઈવે આઠ ઉપર અમદાવાદથી ચાલતાં યુપી જતાં 18 પરપ્રાંતિય યુવાનોને પ્રાંતિજ પોલીસ દ્વારા મેડિકલ ચેકઅપ કરી કમાલપુર કોલેજમાં ક્વોરન્ટાઇન કરાયા હતા. મામલતદાર કચેરી તથા પ્રાંતિજ પાલિકા દ્વારા રહેવા જમવાની વ્યવસ્થા કરાઇ છે. અમદાવાદથી યુપી ચાલતા જતાં 18 પરપ્રાંતિયો પ્રાંતિજ વિસ્તારમાં આવતા પ્રાંતિજ પીઆઇ એમ.ડી.ચંપાવતને ખબર પડતાં રોકી પૂછપરછ કરતાં યુવાનોએ જણાવ્યું કે અમે અમદાવાદથી આવીએ છીએ અને હોટલોમા કામકાજ કરતા હતા. પ્રાંતિજ પીઆઇ દ્વારા આરોગ્ય વિભાગની ટીમની મદદથી મેડિકલ ચેકઅપ કરાયુ હતુ. પ્રાંતિજ નાયબ મામલતદાર અશોકભાઈ પટેલ, દિગવિજયસિંહ તથા પ્રાંતિજ ચીફ ઓફિસર આકાશભાઇ પટેલ દ્વારા કમાલપુરમાં એમ.સી.દેસાઇ આર્ટસ એન્ડ કોમર્સ કોલેજમાં ક્વોરન્ટાઇન કરાયા છે. પ્રાથમિક મેડિકલ ચેકઅપમાં કોઈ લક્ષણ જોવા મળ્યા ન હતા. તેમનુ રેગ્યુલર મેડીકલ ચેકઅપ કરાશે અને ટ્રેન ચાલુ થશે ત્યારે તેમને યુપી મોકલી અપાશે.