ચૂકવણી:પ્રાંતિજની મેપ્સ લી. કંપનીએ ત્રણ માસથી કામદારોને પગાર ન ચુકવતાં સ્થિતિ કફોડી

પ્રાંતિજ  પાસે આવેલ મેપ્સ એન્ઝયમ્સ લી. કંપનીમાં કામ કરતાં 45 કામદારોનો પગાર છેલ્લા ત્રણ મહિનાથી ના ચુકવતા કામદારો દ્વારા કંપનીમાં ભેગા થઇ પગાર આપોના સૂત્રો સાથે માંગ કરી હતી.કંપની દ્વારા છેલ્લા બે વર્ષથી પીએફ તો કાપવામાં આવે છે પણ જમા થતો નથી. ત્યારે કામદારો દ્વારા પ્રાંતિજ મામલતદારને પણ રજૂઆત કરાઇ છે. કંપનીના સુપરવાઇઝર રમેશભાઇએ જણાવ્યું કે 40 જેટલા કામદારોને છેલ્લા ત્રણ મહિનાથી પગાર થયો નથી.

એક અઠવાડિયામાં પગાર ચુકવી દઇશું
આ અંગે કંપનીના માલિક પિયુષભાઇ શાન્તીલાલ પાલખીવાલાએ જણાવ્યું કે કંપનીનો અંદરો અંદર પ્રોબ્લેમ છે. પણ એક અઠવાડિયામાં પગાર ચુકવી દઇશુ. 
પગાર નહીં કરાય તો લેબર કમિશનને જાણ કરાશે
પ્રાંતિજ મામલતદાર એચ.પી.ભગોરાએ જણાવ્યું કે ફરિયાદ મળી હતી અને મેનેજર સાથે ટેલીફોનિક વાત થઈ હતી કે પગાર ચુકવી દઇશુ પણ પગાર ના ચુકવાતા ફરીથી ધ્યાને આવતા મેનેજરનું ધ્યાન દોર્યુ છે અને જો પગાર નહી કરાય તો લેબર કમિશનને જાણ કરીશું.