બેઠક:માસ્ક પહેર્યા વગર ખરીદી માટે આવનારા ગ્રાહકોને વેપારીઓ માલ સામાન નહીં આપે

પાટણ શહેરના બજારમાં માસ્ક પહેર્યા વગર ખરીદી કરવા આવનાર કોઈપણ વ્યક્તિને કોઈ વેપારી માલ-સામાન આપશે નહીં. સ્વૈચ્છીક રીતે જરૂરી તકેદારી રાખવા જિલ્લા કલેક્ટર દ્વારા પાટણ વેપારી મહામંડળ સાથે યોજવામાં આવેલી બેઠકમાં માસ્ક અને સોશિયલ ડિસ્ટન્સીંગ સહિતના અનેક મુદ્દાઓ અંગે સર્વસંમતિથી વિવિધ નિર્ણયો લેવામાં આવ્યા. જિલ્લા કલેક્ટર આનંદ પટેલના અધ્યક્ષસ્થાને પાટણ વેપારી મહામંડળ સાથે યોજાયેલી બેઠકમાં માસ્ક પહેર્યા વગર ખરીદી કરવા આવનાર ગ્રાહકને માલ-સામાન ન વેચવા નિર્ણય કરવામાં આવ્યો. સાથે ખરીદી કરવા આવનાર પરિવારના એકથી વધુ વ્યક્તિ તથા ૧૦ વર્ષથી નાના બાળકોને સાથે લઈ આવનાર વ્યક્તિને પણ માલ-સામાનનું વેચાણ ન કરવા સર્વાનુમતે નિર્ણય લેવાયો . કલેક્ટરએ જણાવ્યું કે, વેપારીઓનો સારો સહયોગ મળ્યો છે આગામી સમયમાં તમામ વેપારીઓના સહયોગથી સામાજીક અંતરની યોગ્ય વ્યવસ્થા સાથે ખરીદ-વેચાણ થાય તે જરૂરી છે.