કાર્યવાહી:હોમગાર્ડની ઓળખ આપી વાહન ચાલકો પાસેથી પૈસા પડાવનારો ઝબ્બે

મહેસાણાના ફતેપુરા સર્કલથી રામોસણા બ્રિજ વચ્ચે પોલીસની ઓળખ આપી પસાર થતી ટ્રકો અટકાવી પૈસા પડાવાતા હોવાની બાતમી આધારે એલસીબી પીએસઆઇ વાય.કે. ઝાલા સહિત સ્ટાફે વોચ ગોઠવી હતી. બુધવારે રામોસણા બ્રિજના છેડે દર્શન હોટલની સામે કેટલાક વ્યક્તિઓ હાઇવે ઉપર વાહનો રોકી ચેકિંગ કરતાં જોઇ પોલીસ અહીં દોડી ગઇ હતી. જેમાં ભાવિન નરોત્તમ કુંતાર (રહે. સોમેશ્વરકુંજ સોસાયટી) ઝડપાઇ ગયો હતો, જ્યારે ભાગી જનાર મહેસાણાના રાઠોડ નરેન્દ્રસિંહ ઉર્ફે ઘુવડ ઉદેસિંહ અને સાહિલ પ્રવિણભાઇ કાપડિયા (રહે. આકાશગંગા સોસાયટી, સોમનાથ રોડ) હોવાનું બહાર આવ્યું હતું.

ભાવિન કુંતારની પૂછપરછ કરતાં તે અગાઉ હોમગાર્ડ તરીકે એ ડિવિજનમાં ફરજ બજાવતો હતો અને છેલ્લા એક મહિનાથી ફરજ પર ગયો નથી. રાત્રે પોલીસ ડ્રેસનું પેન્ટ અને આર્મીજેકેટ પહેરી બે સાગરિતો સાથે મળી હોમગાર્ડની ખોટી ઓળખ આપી છેતરપિંડી કરતો હતો.