હવામાન વિભાગની આગાહી:ભાભર-રાધનપુરમાં પોણા બે ઇંચ વરસ્યો, આજે હળવા વરસાદની શક્યતા

અષાઢી બીજે મેઘરાજાએ ઉ.ગુજરાત ઉપર હેત વરસાવ્યું હતું. જેમાં સૌથી વધુ વરસાદ બનાસકાંઠાના ભાભર અને પાટણના રાધનપુરમાં પોણા બે ઇંચ નોંધાયો હતો. મહેસાણા જિલ્લામાં વડનગરમાં 4 મીમી, ઊંઝામાં 2 મીમી અને મહેસાણામાં ઝાપટું પડ્યું હતું. ચાણસ્મામાં પોણો ઇંચ, પાટણમાં અડધો ઇંચ, પોશીનામાં 9 મીમી, શંખેશ્વર, હારિજ અને સિદ્ધપુર તાલુકામાં પણ વરસાદી ઝાપટાં વરસ્યાં હતાં.

27 જૂને જિલ્લામાં ચોમાસુ બેઠા બાદ પશ્ચિમ દિશાનો પવન ફૂંકાવાનો શરૂ થયો હતો. જેને લઇ સતત 5 દિવસ સુધી જિલ્લામાં વરસાદ પડ્યો ન હતો. જોકે, શુક્રવારે વડનગરમાં 4 મીમી અને ઊંઝામાં 2 મીમી વરસ્યો હતો. મહેસાણા, બહુચરાજી સહિતના વિસ્તારોમાં સાંજે 6 વાગે હળવું ઝાપટું પડ્યું હતું.

હવામાન વિભાગની આગાહી મુજબ, શનિવારથી જિલ્લામાં સંપૂર્ણ રીતે નૈઋત્યના પવન ફૂંકાવાનું શરૂ થશે. જેના કારણે ધીમે ધીમે વરસાદનું જોર વધશે. શનિવારે જિલ્લામાં સરેરાશ 5 મીમી જેટલો વરસાદ વરસી શકે છે.