વાતાવરણ:40 દિવસ બાદ સૌથી ગરમ દિવસ,તાપમાન 32.5 ડિગ્રી, ઉત્તર ગુજરાતમાં ઠંડીનો પારો 11 ડિગ્રી આસપાસ રહ્યો

ઉ. ગુ.માં અનિયમિત દિશાના પવન વચ્ચે બુધવારે ઠંડીમાં સામાન્ય ઉતાર-ચડાવ નોંધાયો હતો. જ્યારે ગરમીનો પારો 2 ડિગ્રી ઉચકાતાં મહત્તમ તાપમાન 32 ડિગ્રીની પાર પહોંચ્યો હતો. ડીસા શહેરનું 32.5 ડિગ્રી તાપમાનના કારણે 40 દિવસ બાદ બુધવાર સૌથી ગરમ દિવસ રહ્યો હતો. ઉલ્લેખનીય છે કે, ગત તા.30 નવેમ્બરે સૌથી ઉંચુ તાપમાન 34.1 ડિગ્રી નોંધાયું હતું.

બીજી બાજુ સાંજ બાદ જ્યાં ગરમ કપડાંનો સહારો લેવો પડે છે, ત્યાં દિવસના ઉંચા તાપમાન કારણે અનુભવાતી ગરમીના કારણે બેવડી ઋતુનો અનુભવ થઇ રહ્યો છે.હવામાન વિભાગના જણાવ્યા અનુસાર, ગુરૂવારે આકાશમાં અંશત: વાદળો રહી શકે છે. જેના કારણે આગામી 24 કલાક ઠંડી અને ગરમીની સ્થિતિ રહેવાની શક્યતા છે. ત્યાર બાદ શુક્રવાર થી ઠંડીનું પ્રમાણ ઘટવાનું શરૂ થશે.