ઉત્તર ગુજરાતમાં કોરોનાના 100 કેસ:મોઢેરા અને ફતેપુરાનાં કોરોનાગ્રસ્ત બે મહિલાનાં મોત, નવા 40 દર્દીઓ વધ્યા

મહેસાણામાં કોરોનાની સારવાર દરમિયાન રવિવારે વધુ બે વૃદ્ધાઓનાં મોત થયાં હતાં. બહુચરાજીના મોઢેરાના જશોદાબેન ઠક્કર (63) અને ફતેપુરા પિલવાઇનાં અંબાબેન ચૌધરી (54) કોવિડ હોસ્પિટલમાં કોરોના સામે જંગ હારી ગયાં હતાં. જ્યારે જિલ્લામાં નવા 40 કેસનો ઉમેરો થયો છે. જેમાં મહેસાણામાં-11, વિસનગર-12, કડી-4, ઊંઝા-8, વિજાપુર-4 અને સતલાસણામાં 1 કેસ નોંધાયો છે.

80 ટકા દર્દીઓ ક્યાંથી સંક્રમિત થયા તે બાબતે માહિતી ન આપતાં આરોગ્ય વિભાગ પણ કોરોનાની ચેન તોડવામાં નિષ્ફળ રહ્યું છે. રવિવારે 420 લોકોના કોરોના સેમ્પલ લેવાયા હતા. જ્યારે 31 દર્દીઓ સ્વસ્થ થતાં રજા અપાઇ હતી. હજુ 577 દર્દી સારવાર લઇ રહ્યા છે.

મહેસાણાના વિસનગર રોડ પર રહેતા 53 વર્ષના આધેડને કોરોના પોઝિટિવ આવતાં તેમને આઇસોલેટ કરી તેમનાં 49 વર્ષીય પત્નીનું સેમ્પલ લેવાતાં રિપોર્ટ પોઝિટિવ આવ્યો હતો. જ્યારે વિજાપુરના ગવાડા ગામે 57 વર્ષના વૃદ્ધ અને તેમનાં પત્નીની તબિયત બગડતાં લેવાયેલા સેમ્પલનો રિપોર્ટ પોઝિટિવ આવતાં આઇસોલેટ કરાયા હતા. ઊંઝા શહેરના જીવાપરૂમાં પણ એક જ પરિવારના બે સભ્યો પોઝિટિવ આવ્યા હતા, જેમને પણ આઇસોલેશનમાં રખાયા છે.