વિવાદ:લગ્નના એક વર્ષમાં ભંગાણ, પત્ની ઘરે જતાં પતિ બે દિવસ સુધી ફરક્યો જ નહીં

લગ્નના માત્ર એક વર્ષમાં ગાડી અને મકાન માટે દહેજ માંગી સાસરિયાંએ ઘરમાંથી કાઢી મુકતા યુવતી સપ્તાહ પિયરમાં રોકાઇને સાસરીમા પરત ફરતાં પતિ ઘરમાંથી ગાયબ થઇ ગયો હતો. બે દિવસ સુધી પતિ ઘરે ન આવતાં આખરે કંટાળેલી યુવતીએ મહેસાણા મહિલા પોલીસ સ્ટેશનમાં ફરિયાદ આપી હતી.અમદાવાદની અવની ઉર્ફે સ્વીટી દશરથભાઇનાં લગ્ન મહેસાણાના હિરેન પુનમચંદ્ર બેન્કર સાથે થયા હતા. યુવતીની ફરિયાદ મુજબ, પતિ અને સાસરિયાં ગાડી અને ઘર ખરીદવા દહેજની માંગણી કરતા હતા.

એક મહિના પહેલાં મહિલાને ઘરમાંથી કાઢી મૂકતાં પિયર ગયેલી યુવતીએ પતિ અને સાસરિયાંનો મોબાઇલ પર સંપર્ક કરવા પ્રયાસ કર્યો ત્યારે તેમને તેણીને બ્લોકમાં મુકી દીધી હતી. લગ્ન જીવન બચાવવા યુવતી સપ્તાહ બાદ સાસરીમાં પરત ફરી હતી.બે દિવસના રોકાણ દરમિયાન પતિ ઘરે ન આવતાં તેણી કંટાળી પિયર ચાલી ગઇ હતી. અવનીએ મહિલા પોલીસ સ્ટેશનમાં પતિ હિરેન પુનમચંદ બેન્કર, મુકુંદબેન પુનમચંદ બેન્કર, રાહુલ પુનમચંદ બેન્કર, રોનક પુનમચંદ બેન્કર, શિલ્પાબેન રાહુલભાઇ બેન્કર, અમીતાબેન રોનકકુમાર બેન્કર સામે ગુનો નોંધાવતા પોલીસે આગળની કાર્યવાહી હાથ ધરી હતી.