કોરોનાગ્રસ્ત:છઠિયારડામાં નિવૃત્ત જમાદાર અને મહિલા કોરોના પોઝિટિવ

મહેસાણા તાલુકાના છઠિયારડા ગામના 72 વર્ષના નિવૃત્ત જમાદાર ઇયેખાન પઠાણ કોરોના સંક્રમિત સમીરભાઇના સંપર્કમાં આવતા તેમનો રિપોર્ટ પોઝિટિવ આવ્યો છે. તેઓ ડાયાલિસીસ પણ કરાવતા હોઇ સંક્રમણનો ભય મોટો હતો. જ્યારે આજ ગામના અને લોકડાઉન દરમિયાન સુરતથી વતન આવેલા 80 વર્ષનાં શાંતાબેન શીવરામદાસ પટેલ કે જેમને સપ્તાહ અગાઉ તાવ, શરદી અને ઉધરસ થતાં ગામના ર્ડા. કમલેશભાઇ પટેલના દવાખાનામાં સારવાર લીધી હતી અને તેમનો રિપોર્ટ પોઝિટિવ આવ્યો છે. તેઓ સુરતથી કે પછી ગામમાંથી સંક્રમિત થયા હોવાનું અનુમાન છે.
વડનગરના મોલીપુર ગામે કન્ટેટમેન્ટ ઝોનમાં  રહેતાં હસુમતી રીતેશભાઇ પરમાર (30)ને તાવ, શરદી હોવાનું ડોર ટુ ડોર સર્વેમાં ખુલ્યા બાદ લેવાયેલા સેમ્પલમાં રિપોર્ટ પોઝિટિવ આવ્યો છે.
બે દર્દીઓનો પુન: રિપોર્ટ કોરોના પોઝિટિવ આવ્યો
વડનગર સિવિલમાં છેલ્લા 12 દિવસથી સારવાર લઇ રહેલા કોરોના સંક્રમિત વિજાપુરના અલ્પેશજી બારડ અને મોલીપુરના મધુબેન અહેમદભાઇ સાઉદીને રજા આપતાં પહેલાં પુન: સેમ્પલ લેવાયાં હતાં. જેનો બુધવારે રિપોર્ટ પોઝિટિવ આવતાં તેની સારવાર લંબાઇ છે.