હાલાકી:મહેસાણા પરામાં રામપાર્ક સોસાયટી, પોલીસ ચોકી આગળ ગટર ઉભરાતાં રહીશો પરેશાન

મહેસાણાના પરા વિસ્તારમાં પટેલવાડીથી અંબાજી માતાના મંદિર અને ટાવરથી ચોકની લીમડી સુધીમાં ભૂગર્ભ ગટરના પાણી વારંવાર ઉભરાતાં લોકોને ગંદા પાણીમાંથી પસાર થવું પડે છે. અસહ્ય દુર્ગંધથી આસપાસ રહેતા લોકો વેદના વેઠી રહ્યા છે અને રોગચાળો ફાટી નીકળે તેવી દહેશત રહેલી હોઇ સત્વરે મરામત કરવા વિસ્તારના જાગૃત નાગરિકો દ્વારા નગરપાલિકાના ચીફ ઓફિસરને રજૂઆત કરાઇ હતી.

નવા પરા વિસ્તારમાં રહેતા દિનેશકુમાર પટેલે રજૂઆત કરતાં કહ્યું કે, હાલતમાં પણ કુકસ રોડ પરના મનોપાર્ક પાસે શ્રીરામપાર્ક સોસાયટી આગળ તેમજ હૈદરીચોક સરોવર પોલીસચોકી આગળ ગટરના પાણી રોડ પર ફેલાયેલા છે. પરામાં ટાવર આસપાસ પણ ઘણા દિવસ બાદ સફાઇ થતાં હાલ પૂરતી રાહત થઇ છે. હાલ રામપાર્ક અને પોલીસચોકી આગળ ગટર ઉભરાતાં આજુબાજુ વસતા લોકો પરેશાન છે અને આનાથી રોગચાળો ફેલાવાનો ભય સતાવી રહ્યો છે, છતાં હજુ સુધી મરામત ન થતાં રહિશો કંટાળ્યા છે. ત્યારે વારંવાર ઉભરાતી ગરટની મરામત કરી સમસ્યા હલ કરવા રજૂઆત કરાઇ છે.