અકસ્માત:બોરીસણામાં વાહનની ટક્કરે રાહદારીનું મોત

કડીના બોરીસણા ગામની સીમમાં નર્મદા કેનાલ નજીક અજાણ્યા વાહનની ટક્કરે 70 વર્ષીય રાહદારીનું મોત થયું હતું. કડીના સુજાતપુરા રોડ પર આવેલી બાલાજી સોસાયટીમાં રહેતા મનુભાઇ રામાભાઇ પ્રજાપતિના 70 વર્ષના પિતા શુક્રવારે બોરીસણા ગામથી નર્મદા કેનાલ નજીક પ્રવિણભાઇ પટેલના બોર નજીક રોડ પરથી પસાર થઇ રહ્યા હતા. ત્યારે પૂરઝડપે નીકળેલા પીકઅપ ડાલાએ તેમને ટક્કર મારી અકસ્માત સર્જ્યો હતો.

અકસ્માતમાં માથા અને શરીરે ગંભીર ઇજા થયેલી હાલતમાં રામાભાઇ પ્રજાપતિને તાત્કાલિક સારવાર માટે દવાખાને લઇ જવાયા હતા. જ્યાં સારવાર દરમિયાન તેમનું મોત થયું હતું. જ્યારે અકસ્માત બાદ પીકઅપ ડાલાનો ચાલક નાસી ગયો હતો. મૃતકના પુત્રએ કડી પોલીસમાં ફરિયાદ નોંધાવી હતી.