ક્રાઇમ:ખેરપુરમાંથી બાળકી ગુમ, અપહરણનો ગુનો નોંધાયો

કડી તાલુકાના ખેરપુર ગામની 11 વર્ષની બાળકી ગુમ થતાં નંદાસણ પોલીસે અપહરણનો ગુનો નોંધી તપાસ હાથ ધરી છે. પતિ સાથે અણબણ થતાં 1 વર્ષથી ભગવતીબેન મંગાજી દંતાણી તેમની પુત્રીને લઇ ખેરપુરમાં માતાની સાથે રહેતા હતા. ભગવતીબેન મજૂરીકામે જાય ત્યારે તેમની 11 વર્ષની પુત્રીની સંભાળ તેના દાદી રાખતા હતા. ચાર દિવસ અગાઉ પરિવારની ગેરહાજરીમાં સવારે કોઇને જાણ કર્યા વિના ગુમ થતાં શોધખોળ હાથ ધરાઇ હતી. આ અંગે કડી પહોંચેલા ડીવાયએસપી રુહી પાયલાને માહીતી મળતાં નંદાસણ પોલીસને ફરિયાદ દાખલ કરવા સૂચના આપી હતી.

જેને આધારે 11 વર્ષની બાળકીના અપહરણનો ગુનો નોંધાયો છે. પોલીસે પરિવારની સાથે આસપાસ રહેતાના નિવેદન તેમજ શકમંદોના સીડીઆર મેળવી તે દિશામાં તપાસ લંબાવી છે. ભગવતીબેનના ભાઇ વિરુદ્ધ નોંધાયેલી પોક્સોની ફરિયાદ અંતર્ગત તે એક વર્ષ જેલમાં જઇ આવ્યો છે. ત્યારે તેના સામેના પક્ષના લોકો બાળકીને હેરાન કરતા હોવાની ફરિયાદ લઇને ભગવતીબેન ચાઇલ્ડ લાઇનમાં ગયા હતા.