હાથાપાઈ:મોઢેરામાં ખેત મજૂરી કરવા બાબતે મજુરે ખેડૂત પર કોદાળી મારી હુમલો કર્યો

મહેસાણાના મોઢેરામાં ખેડૂત પર સામાન્ય બાબતે હુમલાની ઘટના સામે આવી છે. મોઢેરાના પથુપુરાવાસમાં રહેતાં લીલાજી ઠાકોર બુધવારે બપોરે મોઢેરાથી સમલાયાપુરા જવાના રોડ પર બાબુ પટેલના ખેતરમાં રાયડાનું હલર લઇને પહોંચ્યાં હતા. આ સમય દરમિયાન ત્યાં હલર કાઢવાનું કામ ચાલી રહ્યું હતું.

તેવામાં 3 વાગે ગામનો ભાવેશ નામનો શખ્સ મજૂરી કરવાની છે એમ કહીને બાબુભાઇના ખેતરમાં આવ્યો હતો. તેણે ગુસ્સામાં આવીને લીલાજીને કહ્યું હતું કે તેમણે ભાવેશને કેમ મજૂરી માટે નથી બોલાવ્યો. આમ બંન્ને શખ્સો વચ્ચે બોલાચાલી થતા ઉશ્કેરાઈ ગયેલા ભાવેશે કોદાળી વડે લીલાજી પર હુમલો કરી દીધો હતો. જેમાં તેમના માથાના ભાગે અને ખભાના ભાગે કોદાળીના ઘા વાગતા તેઓ ઇજાગ્રસ્ત બન્યા હતા.

પોલીસે ઇસમ વિરૂદ્ધ વધારે તપાસ હાથ ધરી
આવી નજીવી બાબતે ઇસમે ખેડૂત પર કોદાળી વડે હુમલો કરી દેવાની ઘટના પ્રકાશમાં આવતા સ્થાનિકોમાં ચકચાર મચી જવા પામી હતી. આ હુમલામાં ખેડૂત ગંભીર રીતે ઘવાયા હતા, જેના કારણે તેમને વધારે સારવાર અર્થે હોસ્પિટલમાં ખસેડવામાં આવેલા. જ્યાં તેમને 4થી 5 ટાંકા આવ્યા હોવાની વિગતો સામે આવી છે.

આ ઘટનાને પગલે ખેડૂતે ગામના ઇસમ સામે મોઢેરા પોલીસ મથકે ફરીયાદ નોંધાવી છે. જેને લઇને મોઢેરા પોલીસે ઇસમ સામે આઇપીસી 307 અને જીપીએ કલમ 135 મુજબ ગુનો નોંધી વધુ તપાસ હાથ ધરી છે.