ધરપકડ:મહેસાણામાં મોબાઇલ એપથી ક્રિકેટસટ્ટો રમતાં ત્રણ ઝડપાયા

મહેસાણા શહેરના ભોંયરાવાસમાં ચોકની લીમડી વિસ્તારમાં મોબાઇલ એપના આધારે ક્રિકેટસટ્ટો રમતાં 3 સટોડિયાને એ ડિવિજન પોલીસે રંગેહાથ ઝડપી લીધા હતા.મહેસાણા એ ડિવિજન પોલીસ સ્ટેશનના એએસઆઇ કિરીટભાઇ ચૌધરી સ્ટાફ સાથે પેટ્રોલિંગમાં હતા, ત્યારે મહેસાણા શહેરના ભોંયરાવાસ ચોકની લીમડી પહોંચ્યા ત્યારે ઓસ્ટ્રેલિયામાં રમાઇ રહેલી ક્રિકેટ સિરીઝમાં દિલ્હી અને નોર્થલેન્ડ વોરિયર્સ વચ્ચેની મેચ પર જોટાણાનો નાગોરી યુનુસ ઇબ્રાહીમભાઇ શહેરના કસ્બામાં ભોંયરાવાસના નાકા પાસે બેસી મોબાઇલ ફોન ઉપર ક્રિકેટસટ્ટાની એપ્લીકેશન ડાઉનલોડ કરી તેના ઉપર ક્રિકેટ સટ્ટાબેટિંગનો હાર-જીતનો જુગાર રમાડતો હોવાની બાતમી મળી હતી.

જેને આધારે પોલીસે અહીં રેડ કરી મોબાઇલ અને રોકડ રૂ. 900 મળી કુલ રૂ.5900ના મુદ્દામાલ સાથે હર્ષદભાઇ, લાલભાઇ ઠાકોર, યુનુસ ઇબ્રાહીમ નાગોરીની ધરપકડ કરી તમામ સામે એ ડિવિજન પોલીસ સ્ટેશનમાં ફરિયાદ નોંધાવતાં પોલીસે તપાસ હાથ ધરી છે.