ઠંડીનો કર્ફ્યૂ:મહેસાણામાં ઠંડી 2 ડિગ્રી ઘટી પણ ચમકારો માઉન્ટ આબુ જેવો

મહેસાણા4 મહિનો પહેલા
  • કૉપી લિંક
મહેસાણાના બીકે રોડ રાત્રે 8-45 વાગે સુમસામ બની જોવા મળ્યો હતો. - Divya Bhaskar
મહેસાણાના બીકે રોડ રાત્રે 8-45 વાગે સુમસામ બની જોવા મળ્યો હતો.
  • ઉત્તર-પૂર્વીય ઠંડા પવન અને 80 ટકાથી વધુ ભેજના કારણે દિવસ-રાતનું તાપમાન સામાન્યથી નીચે રહ્યું હતું.
  • ઉત્તર ગુજરાતમાં આગામી 2 દિવસ ઠંડીનો ચમકારો રહેશે
  • શહેરમાં 10.4 અને માઉન્ટ આબુમાં માયનસ 3 ડિગ્રી ઠંડી

ઉત્તર ગુજરાતમાં 7 દિવસ બાદ મંગળવારે લઘુત્તમ તાપમાન 2 ડિગ્રી સુધી ઉંચકાયું હતું. તેમ છતાં મહેસાણા શહેર સહિત મુખ્ય 5 શહેરોમાં ઠંડીનો પારો 11 ડિગ્રીથી નીચે રહેતાં કાતિલ ઠંડીનો ચમકારો અનુભવાયો હતો. મહેસાણામાં ઠંડી 10.4 ડિગ્રી નોંધાઇ હતી. પરંતુ તેનો અનુભવ માઉન્ટ આબુ જેવો રહ્યો હતો.

હવામાન વિભાગ મુજબ, આગામી 2 દિવસ દિવસ-રાતના તાપમાનમાં સામાન્ય વધ-ઘટ રહેશે. પરંતુ ઠંડીનો ચમકારો યથાવત રહેશે. ત્યાર બાદ લઘુત્તમ તાપમાન 2 થી 3 ડિગ્રી ઉંચકાતાં તાપમાન 13 ડિગ્રીની આસપાસ પહોંચી શકે છે. જેના કારણે કાતિલ ઠંડીથી છુટકારો મળી શકે છે.

ઉ.ગુ.માં ઠંડીનો પારો

મહેસાણા10.4 (+2.0) ડિગ્રી
પાટણ10.1 (+1.9) ડિગ્રી
ડીસા09.9 (+0.4) ડિગ્રી
ઇડર10.1 (+1.6) ડિગ્રી
મોડાસા10.7 (+1.1) ડિગ્રી

વેસ્ટર્ન ડિસ્ટર્બન્સની અસર પૂરી થતાં છેલ્લા 3 દિવસથી મહેસાણામાં હાડ થિજાવતી ઠંડીનો અનુભવ થઇ રહ્યો છે. મંગળવારે દિવસનો પારો સામાન્યથી 3.1 ડિગ્રી નીચું રહેતાં 22.9 ડિગ્રી તાપમાન નોંધાયું હતું. જ્યારે રાત્રિ દરમિયાન પારો સામાન્યથી 0.6 ડિગ્રી નીચો રહેતાં 10.4 ડિગ્રી તાપમાન નોંધાયું હતું.

સોમવાર સાંજે 6 વાગ્યાથી બીજા દિવસ સવારે 10 વાગ્યા સુધી 20 ડિગ્રીથી નીચા તાપમાનના કારણે સમી સાંજ બાદ રસ્તાઓ પર ટ્રાફિક આપમેળે ઘટી જાય છે. રાત્રે 9 વાગ્યા સુધી તોરણવાળી માતા ચોક, બીકે રોડ સહિતનાં જે બજારોમાં લોકોની અવરજવર રહેતી હોય છે, તે બજારમાં ઠંડીના કારણે જાણે કર્ફ્યૂ પડ્યો હોય તેમ સૂમસામ જણાતાં હતાં. જ્યારે ગુજરાતને અડીને આવેલા હિલ સ્ટેશન માઉન્ટમાં આજે પણ માયનસ 3 ડિગ્રી તાપમાન નોંધાયું હતું, જેને લઇ વાતાવરણ ઠંડુગાર બની ગયું હતું.

અન્ય સમાચારો પણ છે...