સ્થાનિક સ્વરાજયની ચૂંટણી:મહેસાણા પાલિકામાં વોર્ડ નં.2 અને 10માં મતદાન માટે બે-બે બેેલેટ યુનિટ વપરાશે

મહેસાણા નગરપાલિકાના કુલ 11 વોર્ડ પૈકી વોર્ડ નં.2 અને 10માં 14 કરતાં વધુ એટલે કે અનુક્રમે 18 અને 20 ઉમેદવારો હોવાથી અહીં મતદાન માટે બે-બે બેલેટ યુનિટનો ઉપયોગ કરવો પડશે. એક બેલેટ યુનિટમાં 16 બટન પૈકી 14 ઉમેદવારોના, એક નોટા અને એક મતદાન રજીસ્ટર્ડ કરવા માટેનું બટન હોય છે. વોર્ડ નં.2ના 16 અને વોર્ડ નં.10ના 14 મતદાન મથકોમાં બે-બે બેલેટ યુનિટની વ્યવસ્થા કરાશે.

વોર્ડ નં.2માં ભાજપ-કોંગ્રેસ અને આપના 4-4, બહુજન સમાજ પાર્ટીના ત્રણ, બહુજન મુક્તિ મોરચાના બે અને એક અપક્ષ મળી કુલ 18 ઉમેદવારો છે. જ્યારે વોર્ડ10માં ભાજપ, કોંગ્રેસ અને આપના 4-4, બહુજન મુક્તિ મોરચાના બે, 6 અપક્ષ મળી કુલ 20 ઉમેદવારોનો સમાવેશ થાય છે.

નોડલ અધિકારી અલ્પેશ પટેલે ઉમેદવારોને મતદાન પ્રક્રિયા અને મતદાન મથકો અંગે માહિતગાર કરતાં કહ્યું કે, બેલેટ યુનિટમાં 16 બટન પૈકી 14 ઉમેદવારોના નામ, ત્યાર પછી એક બટન નોટાનું હોય છે (એકપણ ઉમેદવાર પસંદ ન હોય તો આ બટન દબાવી શકાય) અને છેલ્લું બટન રજીસ્ટ્રેશન માટેનું હોય છે. એટલે કે બેલેટ યુનિટમાં જે ઉમેદવારો પસંદ હોય તેમની સામેનું બટન દબાવી છેલ્લે રજીસ્ટ્રેશનનું બટન દબાવ્યા બાદ જ મતદાન પૂર્ણ થશે. આ રજીસ્ટ્રેશન બટન દબાવતાં બીપ અવાજ આવશે. પાલિકામાં વોર્ડદીઠ ચાર બેઠકો છે એટલે મતદારો ઓછામાં ઓછા એક મત અને વધુમાં વધુ ચાર મત આપી શકશે. છેલ્લે રજીસ્ટ્રેશન બટન દબાવવું ફરજિયાત છે. કોઇ ઉમેદવાર પસંદ ન હોય અને નોટાનું બટન દબાવ્યું તો પણ રજીસ્ટ્રેશન બટન દબાવ્યાથી જ નોટામાં મત પડશે.