ત્રિપાંખિયો જંગ:મહેસાણા તા.પં.માં 5 ફોર્મ પરત ખેંચાયા 32 બેઠક ઉપર હવે 83 ઉમેદવારોનો જંગ

મહેસાણા તાલુકા પંચાયતની 32 સીટની ચૂ઼ટણીમાં સોમવારે 5 ઉમેદવારોએ ચૂ઼ટણીમાંથી ફોર્મ પરત ખેંચી લીધાના અંતે હરીફ ઉમેદવારોનું ચૂંટણી ચિત્ર સ્પષ્ટ થયુ હતું. જેમાં તાલુકાની 32 સીટમાં હવે 83 ઉમેદવારો માટે આગામી તા. 28મીએ ચૂ઼ંટણીમાં મતદાન યોજાશે.તમામ 32 સીટ પર ભાજપ અને કોંગ્રેસની ટક્કર વચ્ચે 9 સીટ પર આમ આદમી પાર્ટી હોઇ આ સીટો પર ત્રિપાંખીયો જંગ જામી શકે છે.આ ઉપરાંત અન્ય, અપક્ષ 11 ઉમેદવારો ચૂ઼ટણી જંગમાં છે.

મહેસાણા તાલુકા પંચાયતની ચૂંટણીમાં માન્ય 88 ઉમેદવારોમાંથી સોમવારે પાંચ ઉમેદવારોએ ફોર્મ પરત ખેંચી લીધા હતા. જેમાં ગોરાદ સીટ પરથી અપક્ષ ઉમેદવાર સંજય રાવળ, લાખવડ સીટમાં અપક્ષ ઉમેદવાર સુમનબેન મેહુલજી ઠાકોર, જગુદણ સીટમાંથી આમ આદમી પાર્ટીના રમેશભાઇ વિઠ્ઠલભાઇ પટેલ તેમજ ગઠા સીટમાંથી બહુજન સમાજ પાર્ટીના મધુબેન કાળુભાઇ સેનમા અને આમ આદમી પાર્ટીના સોનલબેન બાબુભાઇ સેનમાએ ચૂ઼ટણીમાંથી ઉમેદવારી પરત ખેંચી લીધી હતી. હવે તાલુકા પંચાયતની 32 સીટના 83 ઉમેદવારોને ચૂ઼ંટણી ચિન્હ ફાળવાઇ જતાં મતો માટે ઉમેદવારો પ્રચારમાં લાગી ગયા છે.