હુમલો:મહેસાણા શહેરના શંકરપુરામાં બાથરૂમનો દરવાજો પછડાતાં પતિએ પત્નીને છરો મારી દીધો

મહેસાણા શહેરના શંકરપુરામાં પુત્રીને બાથરૂમમાં નવડાવવા જતાં દરવાજો પછડાવા બાબતે ગુસ્સે ભરાયેલા પતિએ પત્નીને છરો મારતાં મહિલાને સિવિલમાં સારવાર માટે લવાયા બાદ તેણીએ પતિ સામે બી ડિવિઝન પોલીસ સ્ટેશનમાં ફરિયાદ આપી હતી.

મહેસાણા દૂધસાગર ડેરીની પાછળ આવેલા શંકરપુરામાં રહેતી સેજલ અમરતજી ઠાકોર રવિવારે સવારે 6 વર્ષની પુત્રી કૃપાને બાથરૂમમાં નવડાવવા બેસતી વખતે બાથરૂમનો દરવાજો બંધ કરવા જતાં પછડાયો હતો. જેથી વિફરેલા પતિએ તેને અપશબ્દો બોલી ગડદાપાટુનો માર માર્યો હતો. માર મારી રહેલા પતિનો વિરોધ કરતાં તેણે પત્ની પર છરા વડે હુમલો કર્યો હતો. જેમાં છરો પકડવા જતાં મહિલાના ડાબા હાથે પહેલી આંગળી અને અંગૂઠા વચ્ચે ઇજા થઇ હતી. મહિલાની બૂમો સાંભળી પડોશીઓએ બચાવી માતાને ફોન કરતાં સિવિલમાં સારવાર માટે લઇ ગયા હતા. પોલીસે પતિને ઝડપી લેવા કાર્યવાહી કરી હતી.