તપાસમાં ખુલાસો:જિલ્લામાં ઇવીએમ ચેકિંગમાં 81 યુનિટ ખામીવાળા નીકળ્યા

મહેસાણા જિલ્લામાં જિલ્લા પંચાયત, 10 તાલુકા પંચાયત અને 4 નગરપાલિકાને ચૂંટણી માટે ફાળવેલા ઇવીએમનું ફર્સ્ટ લેવલ ચેકિંગ પૂર્ણ કરાયું છે. જેમાં 3901 કંટ્રોલ યુનિટમાંથી 43 અને 4295 બેલેટ યુનિટમાંથી 38 ખોટવાયેલા નીકળ્યા હતા. જિલ્લા ચૂંટણી વિભાગે કહ્યું કે, જે-તે ચૂંટણીમાં રિઝર્વમાં રખાયેલા ઇવીએમ ફાળવાયાં છે, આમ છતાં ડિમાન્ડ આવશે તો વધુ ઇવીએમ ફાળવાશે.

જિલ્લામાં ચૂંટણીમાં મહેસાણા અને કડી સેન્ટરથી ઇવીએમનું ફર્સ્ટ લેવલ ચેકિંગ શરૂ કરાયું હતું. જેમાં શરૂઆતમાં પાંચ ઇજનેર બાદ વધુ ચાર ઇજનેર ફાળવાયા હતા અને ત્યાર પછી વિવિધ તાલુકા કક્ષાએ ફાળવેલા ઇવીએમનું ફર્સ્ટ લેવલ ચેકિંગ પૂર્ણ કરાયું છે. જિલ્લા પંચાયત અને તાલુકા પંચાયતોની ચૂંટણી માટે ફાળવેલા 3501 કંટ્રોલ યુનિટ અને 3491 બેલેટ યુનિટનું ચેકિંગ કરાયું હતું, જેમાં 3459 સીયુ અને 3456 બીયુ બરાબર હતા, જ્યારે 42 સીયુ અને 35 બીયુમાં એરર આવતાં ખોટવાયેલા જણાયા હતા. 4 નગરપાલિકાને ફાળવેલા કુલ 400 સીયુમાંથી 1 અને 804 બીયુમાંથી 3 ખોટવાયેલા જણાયા હતા. ડિમાન્ડ આવશે તો વધુ ઇવીએમ ફાળવાશે તેવું તંત્ર દ્વારા જાણવા મળ્યું છે.