તપાસ:જોટાણા તા.પં.માંથી ચોરાયેલા ચેકની તપાસ ડીઆરડીએ નિયામકને સોંપાઇ

જોટાણા તાલુકા પંચાયતની તિજોરીમાંથી ચોરી થયેલા 5 ચેકમાંથી એક ચેક બારોબાર અન્યના ખાતામાં જમા થવાના બહુચર્ચિત કેસની તપાસ પોલીસ કરી રહી છે, ત્યારે જિલ્લા વિકાસ અધિકારીએ આ મામલે ડીઆરડીએના નિયામક મેહુલ દવેને તપાસ સોંપી રિપોર્ટ કરવા સૂચના આપતાં આ કેસ ચર્ચાસ્પદ બન્યો છે. જોટાણા તાલુકા પંચાયતની આઇઆરડી શાખામાં તિજોરીમાંથી 5 ચેક ચોરી થવા મામલે જિલ્લા વિકાસ અધિકારી મનોજ દક્ષિણીએ કહ્યું કે, આ કેસમાં સાચી તપાસ અને સાચી હકિકત ખુલે તે માટે ડીઆરડીએ ડાયરેક્ટરને ઇન્કવાયરી સોંપી છે.

જે તપાસ કરીને રિપોર્ટ કરશે. જાણીને નવાઇ લાગશે કે, આ પ્રકરણમાં ચોરી થયેલા 5 ચેક પૈકીનો જે ચેક નંદાસણના વેપારીના બેંક એકાઉન્ટમાં જમા થયો છે તે ચેક પર જોટાણા તાલુકા વિકાસ અધિકારીની આબેહૂબ ખોટી સહી કરીને વટાવ કરાયો હોવાનું ખુલ્યું છે. જે જોતા તાલુકા વિકાસ અધિકારીની સહી કોણ કરે તે પણ તપાસનો વિષય બન્યો છે.