ઈ-પેમેન્ટ:આજથી 7 સબ રજિસ્ટ્રાર કચેરીમાં દસ્તાવેજોની નોંધણી કરાવી શકાશે

મહેસાણા જિલ્લામાં ઞ્રામ્ય સબ રજીસ્ટ્રાર કચેરીઓ ચાલુ થયા પછી બુધવારથી મહેસાણા, કડી, વિજાપુર, વિસનગર, વડનગર, ખેરાલુ અને ઊંઝાની સબ રજિસ્ટ્રાર કચેરીઓ શરતોને આધિન શરૂ થનાર છે. જેમાં પક્ષકારોએ દસ્તાવેજ નોંધણી માટે ઓનલાઇન એપોઇન્ટમેન્ટ લેવી ફરજિયાત રહેશે. ઈ-પેમેન્ટથી નોંધણી ફી ભરેલ દસ્તાવેજની જ નોંધણી થશે. દસ્તાવેજની નોંધણી માટે સોશિયલ ડિસન્ટન્સિંગ જળવાઇ રહે તે રીતે અંગુઠાનું નિશાન, બાયોમેટ્રીક પદ્ધતિ અને વીડિયો રેકોર્ડિંગ સહિતની હાલની નોંધણી પ્રથા ચાલુ રાખવાની રહેશે. જે વિસ્તારોમાં સ્થાનિક કક્ષાએથી કર્ફ્યુ, કન્ટેન્ટમેન્ટ જાહેર કરેલ હોય તેવા વિસ્તારોમાં સબ રજિસ્ટ્રાર કચેરીઓ બંધ રાખવાની રહેશે. કચેરીઓને સેનેટાઇઝ કરવા માટે સ્થાનિક તંત્રને જણાવી ફ્યુમીગેશન, થર્મલ સ્કેનિંગ કરાવવાનું રહેશે. રજિસ્ટ્રેશનની પ્રક્રિયા શરૂ કરતાં પહેલાં કોરોનાની ગાઇડ લાઇનનું પાલન કરવું પડશે તેમ નોંધણી નિરીક્ષક એન.એસ. પટેલે જણાવ્યું છે.