ટિકિટોમાં ગરબડ:જિલ્લા પંચાયતની 4 બેઠકમાં કોંગ્રેસના બે-બે મેન્ડેટથી ઉમેદવારો બદલાયા

મહેસાણા જિલ્લા પંચાયતની 42 બેઠક માટે ભરાયેલા 191 ફોર્મની સોમવારે ચકાસણી હાથ ધરાઇ હતી. જેમાં ડમી, મેન્ડેટ વગરના અને 2 મેન્ડેટના 78 ફોર્મ રદ કરાયા હતા. જે પૈકી બહુચરાજી, મોઢેરા, કાંસા એનએ અને ગોઠવા બેઠક પર કોંગ્રેસના 2 મેન્ડેટ પૈકી 1-1 મેન્ડેટ રદ કરાયા હતા. મંગળવારે ફોર્મ પરત ખેંચવાની પ્રક્રિયા બાદ ઉમેદવારોનું આખરી ચિત્ર સ્પષ્ટ થશે.જિ.પં.ની બહુચરાજી બેઠક પર કોંગ્રેસમાંથી ભરાયેલા 3 ફોર્મ પૈકી 2ને મેન્ડેટ અપાયું હતું.

જેમાંથી ગીતાબેન દેસાઇના ફોર્મમાં આગળનું મેન્ડેટ રદ કરવાનો ઉલ્લેખ હોઇ તેમનું ફોર્મ માન્ય રખાયું હતું. મોઢેરા બેઠક પર 7 પૈકી 4 કોંગ્રેસના ઉમેદવારોએ ફોર્મ ભર્યા હતા. જેમાંથી ડબલ મેન્ડેટમાં મહેન્દ્રભાઇ પટેલનું પત્તુ કપાતાંવંદનાબેન પટેલ ચૂંટણી લડશે. તેવી જ રીતે ગોઠવા અને કાંસા એનએમાં કોંગ્રેસના ડબલ મેન્ડેટ રદ કરાયા હતા. ડમી ઉમેદવારો સાથે કોંગ્રેસે છેલ્લી ઘડી સુધી મેન્ડેટ જાહેર ન કરતાં મેન્ડેટ મળી જશે તેવું માની બેસેલા ઉમેદવારોએ રોષે ભરાયા હતા.