વારસો:વિહાર સ્વામિનારાયણ મંદિરમાં પૂજાતી વરાહ પ્રભુની મૂર્તિ દેશની એકમાત્ર હોવાનો પુરાતત્વ વિભાગનો મત

વિહાર ગામના વિહારીયા હનુમાનજી મંદિર પાસે પુરાતત્વ વિભાગ છેલ્લા 25 દિવસથી ખોદકામ કરી રહ્યો છે. ખોદકામની સાથે આસપાસના વિસ્તારોમાં સર્ચ કરતી વિભાગની ટીમ ગામના સ્વામિનારાયણ મંદિરમાં પૂજાતી વરાહ ભગવાનની મૂર્તિ સુધી પહોંચી હતી. પ્રાથમિક તબક્કે આ મૂર્તિ સોલંકીકાળની હોવાનું અનુમાન છે.

આ આકારની મૂર્તિ દેશની એકમાત્ર હોવાની પુરાતત્વ વિભાગ જણાવે છે. ઉલ્લેખનીય છે કે, વરાહ ભગવાનની મૂર્તિ ગામના સ્વ.જોઈતારામ ઉજમદાસ પટેલને તેમના ખેતરમાંથી લગભગ 80 વર્ષ પૂર્વે મળી હતી. મૂર્તિ સાથે શંખ, શાલીગ્રામજી અને માટીનું પાત્ર મળી આવ્યું હોવાનું તેમના પરિવારે જણાવ્યું હતું. આ અલભ્ય મૂર્તિની પૂજા-અર્ચના સાથે જાળવણી થાય તે માટે જે-તે સમયે જોઇતારામ પટેલે મૂર્તિને સ્વામિનારાયણ મંદિરમાં પધરાવી હતી.

વરાહ ભગવાની મૂર્તિના મુખના ભાગે ભગવાન વિષ્ણુની નાની પ્રતિમા સાથે આગળના ભાગે દેવી-દેવતાની બે મોટી પ્રતિમા છે. મૂર્તિના પૂછના ભાગમાં કોતરણી વાળુ પાત્ર છે. તેમજ મૂર્તિની પીઠ પર વાસુકીનાગ સાથે સમુદ્ર મંથનનો પ્રસંગ દર્શાવતી દેવ-દાનવોની નાની નાની પ્રતિમાઓ છે. ચારે પગ પર ભગવાનની પ્રતિમાની કોતરણી કરેલી છે.