દૂધ મંડળીની ચૂંટણી:દૂધસાગર ડેરી બાદ ચરાડા મંડળીમાં પણ વિપુલ ચૌધરીના શાસનનો અંત

6 મહિના પહેલાં મહેસાણા દૂધસાગર ડેરીની ચૂંટણીમાં કારમી હાર પછી પૂર્વ ચેરમેન વિપુલ ચૌધરીને તેમના વતન ચરાડા ગામની દૂધ મંડળીની ચૂંટણીમાં પણ હાર ખમવી પડી છે. આ ચૂંટણીમાં પૂર્વ ધારાસભ્ય અમિત ચૌધરી જૂથના તમામ 13 ઉમેદવારોનો વિજય થયો હતો. જ્યારે વિપુલ ચૌધરી સહિત જૂથના 5 ઉમેદવારોનો પરાજય થયો છે. બે બિનહરીફ બેઠકો પણ અમિત ચૌધરી જૂથની હતી. આ સાથે દૂધસાગર ડેરીથી માંડી મંડળી સુધીના સહકારી રાજકારણમાં વિપુલભાઇના શાસનનો હાલ તો અંત આવ્યો છે.

દૂધસાગર ડેરીના કાર્યક્ષેત્રમાં આવતા માણસા તાલુકાના ચરાડા ગામની દૂધ મંડળીની 2 બેઠકો બિનહરીફ થતાં બાકીની 13 બેઠકો માટે વિપુલ ચૌધરી સહિત કુલ 18 ઉમેદવારો મેદાનમાં હતા. જેની રવિવારે યોજાયેલી ચૂંટણીમાં 1254 મતદારોએ મતદાન કર્યું હતું. જેમાં અમિત ચૌધરી સમર્થિત તમામ 13 ઉમેદવારોનો વિજય થયો હતો.

જ્યારે વિપુલ ચૌધરી સહિત 5 ઉમેદવારો પરાજીત થયા હતા. તમામ 18 ઉમેદવારોમાં સૌથી ઓછા 269 મત વિપુલ ચૌધરીને મળ્યા હતા. સૂત્રો મુજબ, વિપુલભાઇ જૂથના ઉમેદવારો તેમનું ફોર્મ ભરીને લાવેલા, વિપુલભાઇ કે તેમના પરિવારથી કોઇ મતદાન કરવા આવ્યું નહોતું. ઉલ્લેખનિય છે કે, ગામની આ મંડળીમાં ઘણા વર્ષો સુધી વિપુલભાઇ બિનહરીફ ચૂંટાતા આવ્યા છે.

​​​​​​​

​​​​​​​