હિટ એન્ડ રન:જમીને ચાલવા નીકળેલા બે વૃદ્ધને કારે ફંગોળ્યા,એકનું મોત

મહેસાણાના માલ ગોડાઉન રોડ પર રવિવારે રાત્રે ચાલવા નીકળેલા બે વૃદ્ધોને કારચાલકે ફંગોળ્યા હતા. જેમાં એકનું ગંભીર ઇજાના કારણે સારવાર દરમિયાન મોત થયું હતું. હિટ એન્ડ રનની આ ઘટના અંગે બી ડિવિજન પોલીસે ગુનો નોંધી વધુ તપાસ હાથ ધરી છે. મહેસાણા શહેરમાં માલ ગોડાઉન રોડ પર આવેલા એબી ટાવરમાં રહેતા બાબુભાઇ નરસિંહભાઇ પ્રજાપતિ (59) અને અક્ષરધામ ફ્લેટમાં રહેતા તેમના મિત્ર જયંતિભાઇ પટેલ (68) રવિવારે રાત્રે 7 વાગે ઘરેથી નિત્યક્રમ મુજબ ચાલવા નીકળ્યા હતા.

તેઓ આસ્વાદ પાર્લરની સામે શારદા સોસાયટી તરફ રોડની સાઇડમાં ચાલતા જઇ રહ્યા હતા, ત્યારે અહીંથી પૂરઝડપે નીકળેલી અર્ટીગા ગાડી (જીજે 06 પીએ 6721)ના ચાલકે બંનેને ટક્કર મારી હતી. આ અકસ્માતમાં બંને વૃદ્ધોને ગંભીર ઇજા થતાં તાત્કાલિક સારવાર માટે લઇ જવાયા હતા. જ્યાં જ્યંતિભાઇ પટેલને માથાના પાછળના ભાગે થયેલી ગંભીર ઇજાના કારણે સારવાર દરમિયાન મોત થયું હતું. આ બનાવ અંગે ઇજાગ્રસ્ત બાબુભાઇ પ્રજાપતિએ બી ડિવિજન પોલીસ સ્ટેશનમાં કારચાલક સામે ગુનો નોંધાવ્યો હતો.