આપઘાત:સગપણ માટે મુરતિયા બતાવતાં 14 વર્ષની કિશોરીનો ઘરમાં ગળે ફાંસો ખાઇ આપઘાત

સગપણ માટે પરિવાર મૂરતિયો બતાવતાં હોઇ મહેસાણા શહેરની એક 14 વર્ષની કિશોરીએ પોતાના ઘરમાં પંખે દુપટ્ટા વડે ગળે ફાંસો ખાઇ આપઘાત કરી લીધો હતો. આ ઘટના અંગે એ ડિવિજન પોલીસે નોંધ કરી વધુ તપાસ હાથ ધરી છે.

મહેસાણામાં વિસનગર રોડ પર સંકેતનગરની પાસે આવેલી પાર્થ સોસાયટીમાં રહેતા રમેશભાઇ મારવાડી શનિવારે પરિવાર સાથે ચા-નાસ્તો કરી કામે ગયા હતા. જ્યારે તેમનાં પત્ની કપડાં ધોવા બેઠાં હતાં. આ સમયે આવું છું તેમ કહી મકાનના ઉપરના માળે ગયેલી 14 વર્ષની પુત્રી સ્નેહા લાંબા સમય સુધી નીચે નહીં આવતાં તેની માતાએ તપાસ કરતાં ચોંકી ગઇ હતી.

રૂમમાં પંખા સાથે દુપટ્ટો ભરાવી ગળે ટૂંપો ખાધેલી હાલતમાં પુત્રીને લટકતી જોઇ મહિલાએ મચાવેલી બૂમો સાંભળી પડોશીઓ સહિત દોડી આવ્યા હતા. સવારે 11 વાગે બનાવની જાણ થતાં ઘટના સ્થળે પહોંચેલા એએસઆઇ કાનજીભાઇ દેસાઇએ લાશનું સિવિલમાં પીએમ કરાવ્યું હતું. તેમના જણાવ્યા મુજબ, પરિવાર મોતનું કારણ હાલમાં ચોક્કસપણે જણાવતા નથી, પરંતુ કિશોરીને સગપણ માટે ત્રણ-ચાર છોકરા બતાવ્યા હતા પરંતુ તે તેને પસંદ ન હતા. સગપણની ઇચ્છા ન હોઇ તેણીએ આપઘાત કર્યો હોવાનું પ્રાથમિક તબક્કે મનાય છે.