ધરપકડ:મહેસાણા ખારી નદી પાસે બિનવારસી ગાડીમાંથી દારૂની 264 બોટલ મળી

મહેસાણા એલસીબીને ખારી નદી પાસેથી બિનવારસી મળી આવેલી ઇન્ડિગો ગાડીમાંથી રૂ. 37,680ના વિદેશી દારૂની 264 બોટલો મળી આવી હતી. જે જપ્ત કરી બી ડિવિજન પોલીસે વધુ તપાસ હાથ ધરી છે. મહેસાણા એલસીબી રાધનપુર રોડ પર પેટ્રોલિંગમાં હતી, ત્યારે ખારી નદીના પુલની નજીક આવેલી પીપલજ હોટલથી જમણી તરફ જતા પાકા રોડ ઉપર એક સફેદ રંગની ટાટા ઇન્ડીગો ગાડી (જીજે 01 ડીએક્સ 0796) બિનવારસી હાલતમાં પડી હોવાની બાતમી મળી હતી.

પોલીસે અહીં પહોચી ગાડીમાં તપાસ કરતાં ગાડીની પાછળની ડેકીનો દરવાજો તારથી બાંધેલો હોઇ ડેકી ઊંચી કરતાં જ પોલીસ ચોંકી ગઇ હતી. પોલીસે અંદરથી વિવિધ બ્રાન્ડની વિદેશી દારૂની રૂ. 37,680ની કિંમતની 264 બોટલો મળી આવી હતી. પોલીસે દારૂ અને રૂ.2.50 લાખની ગાડી મળી કુલ રૂ.2.87 લાખનો ખુદ્દામાલ જપ્ત કરી ગાડીચાલક સામે પ્રોહિબિશન એક્ટ મુજબ ગુનો નોંધી તેની શોધખોળ હાથ ધરી છે.