કામગીરી:મહેસાણાની 160 સોસાયટીનું 2.35 લાખ લાઇટ બિલ પાલિકાએ ભર્યુ

મહેસાણા શહેરની 160 ખાનગી સોસાયટીઓ અટલ સ્ટ્રીટલાઇટ યોજનામાં જોડાતાં તેનું રૂ. 2.35 લાખ સ્ટ્રીટલાઇટ બિલ પાલિકાએ ભર્યું છે. કુલ 278 ખાનગી સોસાયટીઓએ આ યોજનાનો લાભ લેવા અરજી કરી છે. મહેસાણા પાલિકાની અટલ સ્ટ્રીટલાઇટ યોજનામાં અત્યાર સુધી 278 ખાનગી સોસાયટીઓ જોડાઇ છે. જેના સ્ટ્રીટલાઇટ મીટર પાલિકાના નામે કરી બિલમાંથી મુક્તિ આપવા પાલિકામાં કરેલી અરજીઓ મંજૂર કરી મીટર પાલિકાના નામે કરવાની તજવીજ ચાલી રહી છે.

આ દરમિયાન, અત્યાર સુધી 160 જેટલી સોસાયટીઓના સ્ટ્રીટલાઇટ મીટર પાલિકાના નામે થયા પછી આવેલા પ્રથમ અને બીજા વીજબિલ પેટે કુલ રૂ.2.35 લાખ જેટલી રકમ ભરપાઇ કરાઇ છે. એટલે કે, 160 સોસાયટીને સ્ટ્રીટલાઇટ વીજબિલ ખર્ચમાંથી મુક્તિ મળી છે. કેટલીક સોસાયટીઓને આગામી બિલમાં મુક્તિ મળશે. તો કેટલીકની પ્રક્રિયા યુજીવીસીએલમાં પ્રક્રિયા હેઠળ હોઇ પૂર્ણ થયે પાલિકાના નામે વીજ બિલ ભરપાઇ શરૂ થશે. સોસાયટીઓની સ્ટ્રીટલાઇટ પાલિકા હસ્તક થયા પછી 15 સોસાયટીમાં અત્યાર સુધી એલઇડી ફોલ્ટની ફરિયાદ નોંધાઇ છે. જેમાં ખોટવાયેલી લાઇટ કાઢીને નવી એલઇડી નખાતાં ફરી અજવાળાં પથરાયાં છે.