ગત ​​​​​​​વર્ષની સરખામણીએ:ઉત્તર ગુજરાતમાં ઇ-વ્હિકલની ખરીદીમાં 208%નો ઉછાળો

ઉત્તર ગુજરાતમાં વર્ષ 2021ની તુલનાએ વર્ષ 2022ના સાડા 5 મહિનામાં ઇલેક્ટ્રીક વાહનોની ખરીદીમાં 208%નો ઉછાળો આવ્યો છે. તેની પાછળનું કારણ વર્ષની શરૂઆતમાં જ પેટ્રોલ, ડીઝલ અને સીએનજીનો ભાવવધારો જવાબદાર છે. દોઢ વર્ષમાં રજીસ્ટ્રેશન થયેલા ઇ-વ્હિકલમાં 1378 ટુ-વ્હિલર, 100 થ્રી-વ્હિલર અને 43 ફોર-વ્હિલરનો સમાવેશ થાય છે.

ઉત્તર ગુજરાતના 5 જિલ્લાની આરટીઓ કચેરીના ઇ-વ્હિક્લના રજીસ્ટ્રેશનના આંકડા જોઇએ તો, વર્ષ 2021માં 373 ઇ-વ્હિકલનું રજીસ્ટ્રેશન થયું હતું, તેની સામે 2022ના સાડા 5 મહિનામાં 1148 ઇ-વ્હિકલનું રજીસ્ટ્રેશન થયું છે. બીજી બાજુ ઉત્તર ગુજરાતમાં છેલ્લા દોઢ વર્ષમાં નોંધાયેલા 1521 પૈકી 755 ઇ-વ્હિકલ મહેસાણામાં રજીસ્ટ્રેશન થયા છે. એટલે કે, કુલ રજીસ્ટ્રેશનના 49.64% સાથે ઇલેક્ટ્રીક વાહન સ્વિકારવામાં મહેસાણા જિલ્લો ઉત્તર ગુજરાતમાં અગ્રેસર છે.

જ્યારે દોઢ વર્ષમાં માત્ર 19 વાહન સ્વીકારનાર અરવલ્લી જિલ્લામાં ઇલેક્ટ્રીક વાહનોને ઓછા પસંદ કરવામાં આવી રહ્યા છે. આ ઉપરાંત, બનાસકાંઠામાં 291, પાટણમાં 270 અને સાબરકાંઠામાં 186 ઇ-વ્હિકલનું રજીસ્ટ્રેશન થયું છે. ઉલ્લેખનિય છે કે, પેટ્રોલ, ડીઝલ બાદ સીએનજીના ભાવમાં પણ વધારો થતાં લોકો ઇ-વ્હીકલ તરફ ધીમે ધીમે વળી રહ્યા છે.

ઉત્તર ગુજરાતમાં કુલ ઇ-વ્હિકલ રજીસ્ટ્રેશન

વાહનના પ્રકાર પ્રમાણે થયેલું કુલ રજીસ્ટ્રેશન

​​​​​​​(નોંધ : 2022ના વાહનના ડેટા 11 જૂન સુધી)