મુદ્દામાલ જપ્ત:રિક્ષામાં ગેસના બાટલા વેચવા જતાં પકડાયેલા 2 ચોરોએ 5 ચોરી કબૂલી

મહેસાણા એસઓજી પોલીસે મંડાલી ચોકડી નજીકથી રિક્ષામાં ચોરીનો માલ વેચવા જતાં મંડાલીના બે શખ્સોને ગેસના બાટલા અને લોખંડના ફર્મા સહિત રૂ.32 હજારના મુદ્દામાલ સાથે દબોચી લીધા હતા. આ શખ્સોએ લાંઘણજ વિસ્તારની 5 ચોરીઓ કબૂલી હતી.

મહેસાણા એસઓજી પોલીસ પેટ્રોલિંગમાં હતી, ત્યારે મંડાલી ગામ તરફથી બે શખ્સો રિક્ષામાં ચોરીનો માલ અમદાવાદ વેચવા જવાના હોવાની બાતમી આધારે મંડાલી ચોકડી નજીક વોચ ગોઠવી હતી. આ સમયે રિક્ષા લઇને નીકળેલા મંડાલી ચરાવાસના ફકીર સાજીદશા ઈકબાલશા અને પઠાણવાસના પઠાણ મહંમદખાન સાબીરખાનને રિક્ષા (જીજે 18 એવી 6191)માં ભરેલા ગેસના બાટલા અને લોખંડના ફર્મા અંગે પુરાવા માગતા આપી શક્યા ન હતા. બંનેની ઉલટ પૂછપરછ કરતાં તેમણે લાંઘણજ પોલીસ સ્ટેશનની હદની 5 ચોરીઓની કબૂલાત કરી હતી. આથી પોલીસે રૂ.30 હજારના ગેસના 6 બાટલા, રૂ.2200ના 11 ફર્મા અને 75 હજારની રિક્ષા મળી કુલ રૂ.1,07,200નો મુદ્દામાલ જપ્ત કર્યો હતો.