ત્રણ દિવસમાં 30 કેસ:કાલરીમાં માતા-પુત્રી, ઉમતામાં માતા-પુત્ર અને કુંડાળમાં 82 વર્ષના વૃદ્ધ સહિત 11ને કોરોના

મહેસાણા જિલ્લાના ગ્રામ્ય વિસ્તારમાં કોરોનાનું સંક્રમણ સતત વધી રહ્યું છે. શુક્રવારે નોંધાયેલા 11માંથી 7 કેસ મહેસાણા, કડી, વિસનગર અને બહુચરાજી ગ્રામ્ય વિસ્તારના છે. જ્યારે કડી અને વિજાપુર શહેરમાં બે-બે મળી 4 કેસ નોંધાયા છે. આ દર્દીઓમાં કાલરીમાં માતા-પુત્રી, ઉમતામાં માતા-પુત્ર તેમજ કુંડાળમાં 82 વર્ષના વૃદ્ધનો પણ સમાવેશ થાય છે. આરોગ્ય વિભાગે આ તમામ દર્દીઓને હોમ આઇસોલેશન કરી સારવાર શરૂ કરી છે.

કડીમાં 29 અને 30 વર્ષના યુવકને તેમજ કુંડાળ ગામની 82 વર્ષની વૃદ્ધા અને 30 વર્ષની મહિલા, બહુચરાજીના કાલરી ગામના માતા-પુત્રીને, જ્યારે વિસનગરના ઉમતા ગામે રહેતા 28 વર્ષના પુત્રને વાગ્યું હોઇ સારવાર લેવા સાથે ગયેલ 48 વર્ષની માતા સહિત બંનેનો ટેસ્ટ કરતાં કોરોના પોઝિટિવ આવ્યો હતો. બીજી તરફ, મહેસાણા તાલુકાના લાંઘણજ ગામે 15 વર્ષના સગીરને અને વિજાપુરમાં ટીબી રોડ વિસ્તારમાં રહેતી 37 વર્ષની મહિલા અને શહેરના અંદરના વિસ્તારમાં રહેતા 68 વર્ષના વૃદ્ધને કોરોના પોઝિટિવ હોવાનું નિદાન થયું હતું.

છેલ્લા ત્રણ દિવસમાં જિલ્લામાં 30 કેસ કોરોના પોઝિટિવ આવતાં તંત્રએ પણ તેમના નજીકના પરિવારના સભ્યોના સેમ્પલ લઈ દવા આપવા તેમજ આજુબાજુના ઘરોમાં સર્વેલન્સ કરી જરૂર જણાય તો સેમ્પલ લેવા સહિતની કામગીરી હાથ ધરી છે.

ડીસામાં નવા 2 કેસથી બનાસકાંઠા જિલ્લામાં કોરોનાનો પ્રવેશ
બનાસકાંઠામાં ડીસા શહેર અને ડીસા તાલુકાના વરનોડા ગામે 30 વર્ષ અને 65 વર્ષની બે મહિલાને કોરોના પૉઝિટિવ આવ્યો છે. એપેડેમિક ઓફિસર ડો.જીગ્નેશ હરિયાણીએ જણાવ્યું કે કોરોનાનું સંક્રમણ અટકાવવા માટે 233 આરટીપીસીઆર અને 1082 એન્ટીજન સહિત કુલ 1315 સેમ્પલ લેવાયા હતા.

તમામને શરદી, ખાંસી અને તાવના લક્ષણો, ઘરે જ સારવાર
જિલ્લા આરોગ્ય વિભાગે ગુરૂવારે લીધેલા 765 કોરોના સેમ્પલોનું રિઝલ્ટ શુક્રવારે 11 પોઝિટિવ કેસ નોંધાયા છે. તમામ દર્દીઓને શરદી, ખાંસી અને તાવના લક્ષણો જણાયા છે અને કોઇ ટ્રાવેલ હિસ્ટ્રી ન હોવાનું તંત્ર કહી રહ્યું છે. શુક્રવારે ત્રણ દર્દીઓને ડિસ્ચાર્જ મળતાં જિલ્લામાં કોરોનાના એક્ટિવ કેસનો આંકડો 38 થયો છે.