તસ્કરી:કડી તીનબત્તી વિસ્તારમાં આવેલી મુખ્ય પોસ્ટ ઓફિસનાં તાળાં તૂટ્યાં

કડીના કસ્બા સ્થિત તીનબત્તી વિસ્તારમાં આવેલી મુખ્ય પોસ્ટ ઓફિસનાં તાળાં તૂટ્યાં હતાં. જેમાં એક સરકારી મોબાઇલ ચોરાયો હોવાનું ખુલ્યું હતું. પોસ્ટ માસ્તરના નિવેદન આધારે પોલીસે ફરિયાદ નોંધવા તજવીજ હાથ ધરી છે.શહેરની મુખ્ય પોસ્ટ ઓફિસ નાતાલ સહિતની સળંગ ત્રણ દિવસ રજા દરમિયાન તસ્કરોએ નિશાન બનાવી હતી. સોમવારે સવારે સફાઈ કામદાર આવ્યો ત્યારે કચેરીનું તાળું તૂટેલું હતું.

સફાઈ કામદારે પોસ્ટ માસ્તરને જાણ કરતાં સ્ટાફ દોડી આવ્યો હતો. ચોરી થયાની આશંકાને પગલે પોલીસને જાણ કરતાં પોલીસે તપાસ કરતાં ત્રણ દરવાજાનાં તાળાં તોડી અંદર પોસ્ટમેનના રૂમના કબાટ સહિત મુખ્ય કચેરીના રૂમની અંદર ઘૂસી તાળાં તોડી ચોરીનો પ્રયાસ કર્યો હતો. તસ્કરો એક સરકારી મોબાઈલ ચોરી ગયા હોવાનું માલુમ પડ્યું હતું. જે અંગે પોલીસે પોસ્ટ માસ્તર ગોવિંદજી ઠાકોરના નિવેદન આધારે ફરિયાદ નોંધવા તજવીજ હાથ ધરી છે.