કૂતરાંઓનો આતંક:જોટાણા તાલુકામાં રસ્તે રખડતાં કૂતરાનો ત્રાસ 2 મહિનામાં 200થી વધારે લોકોને બચકાં ભર્યા

જોટાણા તાલુકાના જાકાસણાં,જોટાણા,ખદલપુર,મેમદપુર,ચાલાસણ, સાંથલ કસલપુરા ગામમાં રસ્તે રખડતા કુતરાઓનો ત્રાસ ચરમસીમાએ પહોંચ્યો છે.છેલ્લા બે મહિનામાં 200 કરતા વધારે નાની મોટી વ્યક્તિઓને કૂતરા કરડવાના બનાવો સાંથલ,જોટાણા,સૂરજ સહિતના સરકારી હોસ્પિટલોમાં નોંધાયા છે. જોટાણા તાલુકાના સરકારી દવાખાનાઓમાં રોજના 10 થી વધારે વ્યક્તિઓ હડકવાની રસી લેવા આવતા હોવાની માહિતી મળી છે.

તાલુકાના ગામડાઓમાં રખડતા કુતરાઓના ટોળે ટોળાં વળી ભેગા થાય છે અને માર્ગો ઉપર નીકળી પડે છે.દિવસે તેમજ રાત્રે રોડ ઉપરથી પસાર થતા એકલદોકલ વાહનચાલકોની પાછળ દોડે છે અને વાહનનો પીછો કરે છે જેને લઈને વાહનચાલક કુતરાથી બચવા માટે વાહન પુરઝડપે ચલાવતા હોવાથી અકસ્માત નો ભોગ બને છે જ્યારે ચાલતી જતી વ્યક્તિઓને પણ કુતરાઓ પાછળ પડી જાય છે અને સામે આવી બચકું ભરી લેવાના બનાવોમાં પણ વધારો જોવા મળ્યો છે.

પી.એચ.સી.માં વેકસીન નહિ મુકતા હોવાની ફરીયાદ
જોટાણા તાલુકાના ગામડાઓમાં બે મહિનામાં કૂતરા કરડવાના બનાવોમાં વધારો થયો છે ત્યારે તાલુકાના પી.એચ.સી.સેન્ટરોમાં કૂતરા કરડે ત્યારે મુકવામાં આવતી વેકસીન નહિ મુકતા લોકોને જોટાણામાં આવેલ સી.એચ.સી.સેન્ટરોમાં વેકસીન લેવા આવવું પડે છે.જેથી લોકોએ દરેક પી.એચ.સી.સેન્ટરોમાં વેકસીન પૂરતા પ્રમાણમાં રાખવામાં આવે તેવી માંગણી કરી છે.