મુદામાલ:ડીસા નજીકથી રોયલ્ટી ચોરી કરતાં ત્રણ ડમ્પરો ઝડપાયા,માલિકોને રૂ.5 લાખનો દંડ ફટકાર્યો

બનાસકાંઠા જિલ્લાના ખાણ અને ખનીજ વિભાગ દ્વારા મંગળવારે વહેલે પરોઢીયે  ચેકીંગ હાથ ધરી ડીસા પાસેથી રોયલ્ટી ચોરી કરતાં ત્રણ ડમ્પર સહિત રૂ.1.20 કરોડનો મુદ્દામાલ કબ્જે કરી ડમ્પર માલિકોને રૂ.5 લાખનો દંડ ફટકાર્યો હતો.જેને લઈ રેતી ચોરી કરતા શખ્સોમાં ફફડાટ ફેલાયો છે. મંગળવારે વહેલી સવારે રોયલ્ટી ઇન્સ્પેક્ટર શક્તિદાન ગઢવી અને મેહુલ દવેએ ડીસા હાઇવે પર તપાસ હાથ  ધરી હતી.જેમાં નેશનલ હાઇવે પરથી રેતી ભરેલા ત્રણ ડમ્પરોની તલાસી લેતા રોયલ્ટી ચુકવ્યા વગર નીકળ્યા હોવાનું જણાયું હતું.જેથી ખનીજની ચોરી કરી લઈ જતા હોવાનું માલુમ પડતા ભૂસ્તર વિભાગે રેતી ભરેલા ત્રણ ડમ્પર સહિત રૂ 1.20 કરોડનો મુદ્દામાલ કબ્જે કર્યો હતો.તેમજ ડમ્પર માલિકોને રૂ.5 લાખનો દંડ ફટકાર્યો હતો. જેને લઈ ફફડાટ ફેલાયો હતો.