ચકાસણી:ડીસામાં હેલ્થ કાર્ડ મેળવવા વેપારીઓની ભીડ

ડીસામાં લોકડાઉન દરમિયાન દોઢ મહિનાથી બંધ પડેલી દુકાનો ખોલવા માટે તંત્ર દ્વારા કવાયત હાથ ધરવામાં આવી છે.જેમાં આવશ્યક ચીજવસ્તુઓના વેચાણ કરતા વેપારીઓના આરોગ્યની ચકાસણી કરી હેલ્થ કાર્ડ આપવામાં આવી રહ્યા છે. ડીસામાં કરિયાણા સહિત આવશ્યક ચીજ વસ્તુઓનું વેચાણ કરતા વેપારીઓને  પાલિકા અને તાલુકા હેલ્થ વિભાગ દ્વારા આરોગ્ય ચકાસણી કરવામાં આવી રહી છે.પાલિકામાં નોંધાયેલ તેમજ હેલ્થ કાર્ડ ધરાવતા વ્યાપારીઓને દુકાન ખોલવાની મંજૂરી આપવાની હોઇ શહેરમાં છેલ્લા બે દિવસથી મામલતદાર કચેરી ખાતે વેપારીઓ અને ગુમાસ્તાઓ હેલ્થ કાર્ડ કઢાવવા માટે ઉમટી પડ્યા છે.મામલતદાર કચેરી ખાતે આરોગ્ય ચકાસણી કર્યા બાદ પાલિકામાં નોધણી કરવામાં આવી રહી છે.વહેલી સવારથી જ કચેરી ખાતે વ્યાપારીઓ તેમજ ગુમાસ્તા ઉમટી પડતા થોડા સમય માટે સોશ્યલ ડીસ્ટન્સનો સરેઆમ ભંગ જોવા મળ્યો હતો.જેથી નાયબ પોલીસ અધિક્ષક ડો.કુશલ ઓઝા અને ડીસા શહેર ઉત્તર પીઆઇ જે.વાય.ચૌહાણ દ્વારા ઘટના સ્થળે દોડી આવી સોશિયલ ડીસ્ટન્સ નો અમલ કરાવવામાં આવ્યો હતો.આ અંગે ડીસા પાલિકાના મુખ્ય અધિકારી ઉપેન્દ્ર ગઢવીએ જણાવ્યું હતું કે આવશ્યક ચીજ વસ્તુનું વેચાણ કરતાં વેપારીઓ તેમજ ગુમાસ્તાઓના આરોગ્યની ચકાસણી કરીને હેલ્થ કાર્ડ ઇશ્યૂ કરાઈ રહ્યા છે.