આયોજન:શંખલપુરમાં કિડની જાગૃતિ અને રોગ નિદાન કેમ્પ યોજાયો

તાલુકાની શંખલપુર ગ્રામ પંચાયત દ્વારા ઇન્ડિયા રિનલ ફાઉન્ડેશનના સહયોગથી કિડની જાગૃતિ તેમજ વિનામૂલ્યે ડાયાબિટીસ, બ્લડપ્રેશર તેમજ આંખનો ચેકઅપ કેમ્પ યોજાયો હતો. જેનો પ્રારંભ ગ્રામ વિકાસ સમિતિના અધ્યક્ષ પરેશ પટેલ અને તલાટી રાજુભાઈ ચૌધરીની હાજરીમાં કરાયો હતો.

કેમ્પમાં 250થી વધુ ગ્રામજનોએ બ્લડસુગર અને બ્લડપ્રેશર ચેક કરાવ્યું હતું. તેમજ દીપ આંખની હોસ્પિટલ દ્વારા 174 લોકોની આંખની તપાસ કરાઈ હતી. પંચાયત દ્વારા દવાનું વિનામૂલ્યે વિતરણ કરાયું હતું. કેમ્પ બાદ રિનલ ફાઉન્ડેશનના કુલદીપ ગાંધી અને ધ્રૃવ ચાવડાએ કિડની જાગૃતિ અંતર્ગત ગ્રામજનોને કિડની બચાવવા કઈ કાળજી રાખવી તેની સમજ આપી હતી.