હેરાનગતિ:ખેરાલુ-મીઠીઘારીઆલ એસટી બસની અનિયમિતતાથી વિદ્યાર્થીઓને હેરાનગતિ

ખેરાલુ ડેપો સંચાલિત મીઠીઘારીઆલ વાયા ચાણસ્માની વિધાર્થી બસ છેલ્લા 10 દિવસમાં પાંચ દિવસ બંધ રાખવામાં આવતા વિધાર્થીઓ સહિત મુસાફરોમાં ભારે રોષ જોવા મળી રહ્યો છે. આ બસનું નિયમિત સંચાલન કરવા એસટી વિભાગીય અધિકારી મહેસાણાએ લેખિતમાં કડક સૂચના આપી હોવા છતાં ખેરાલુ ડેપોના અણઘડ વહીવટના કારણે મુસાફરો વારંવાર પરેશાનીમાં મુકાય છે.

ખેરાલુથી આ બસનો ઉપાડવાનો ટાઈમ 14:00 કલાકનો છે. પરંતુ ડેપોથી રોજબરોજ બસ મોડી આપવામાં આવતા આ બસને મીઠીઘારીઆલ સુધી લાવવાના બદલે બ્રાહ્મણવાડા કે ચાણસ્માથી ખેરાલુ પરત લઈ જવાય છે. જેથી મણિયારી હાઈસ્કૂલમાં અભ્યાસ કરતા ૫૫ જેટલા વિધાર્થીઓ એસટી પાસ ધરાવતા હોવા છતાં આ સમયગાળા દરમિયાન અન્ય બસનો કોઈ ટાઈમ ન હોઈ રઝડી પડે છે.

આ ડેપોની તમામ બસોનું સંચાલન એક ડ્રાઇવરના હવાલે સોંપી દેવાયું છે. જેના કારણે પૂરતું ટ્રાફિક મળતું હોવા છતાં મીઠીઘારીઆલના વિદ્યાર્થીઓ માટે માત્ર પૂર્વગ્રહ રાખી આ બસનું સંચાલન નિયમિત કરવામાં આવતું નથી.ચાણસ્માથી મીઠીઘારીઆલ વચ્ચે આવતા પાંચ જેટલા ગામોના મુસાફરો માટે આ બસનો ટાઈમ ખૂબ ઉપયોગી છે.અગાઉ આ બસનું સંચાલન ખૂબ જ નિયમિત થતું હતું.પરંતુ આ ટ્રીપને અન્ય ટ્રીપ સાથે જોડી દેવામાં આવતા આ અનિયમિતતા ઉભી થઇ છે.જો આ બસનું સંચાલન નહિ કરવામાં આવે ૧૫મી ઓગસ્ટે છાત્રો સાથે 5 ગામોના લોકોને એસટી રોકો કાર્યક્રમ આપવાની ફરજ પડશે.