મહીસાગર ક્રાઇમ અપડેટ:સંતરામપુર શહેરની ગુમ થયેલી યુવતી દાહોદના સુખસરથી મળી; લુણાવાડા ખાતેથી મોબાઈલ ચોરને ઝડપી પાડ્યો

લુણાવાડા ખાતેથી મોબાઈલ ચોરને ઝડપી પાડ્યો
પંચમહાલ રેન્જ આઈ.જી ચિરાગ કોરડિયા તથા મહીસાગર જિલ્લા પોલીસ વડા રાકેશ બારોટ દ્વારા આપેલ સૂચના અને માર્ગદર્શન મુજબ લોકલ ક્રાઇમ બ્રાન્ચ PI આર.ડી.ભરવાડએ PSI પી.એમ.મકવાણા તથા સ્ટાફની અલગ અલગ ટીમો બનાવી મિલકત સંબધિ બનેલ વણશોધાયેલ ગુનાઓ શોધવા તથા આવા બનાવ બનતા અટકાવવા માટે ખાનગી બતમીદારો રોકવામાં આવ્યા હતા અને હ્યુમન સોર્સ તેમજ ટેક્નિકલ સોર્સની મદદ લીધી હતી. તે સમયે ટેક્નિકલ સોર્સના આધારે મહીસાગર જિલ્લાના બાકોર પોલીસ સ્ટેશનમાં મોબાઈલ ચોરી અંગેની નોંધાયેલ ફરિયાદના આરોપી અજય સુરેશ સોલંકીને ચોરી થયેલા oppo કંપનીના મોબાઈલ સાથે લુણાવાડા ખાતેથી LCB દ્વારા ઝડપી પાડવામાં આવ્યો હતો. ત્યારબાદ આરોપીને હસ્તગત કરી આગળની કાયદેસરની કાર્યવાહી કરવામાં આવી છે.

સુખસર ખાતેથી ગુમ થયેલી યુવતી મળી આવી
પંચમહાલ ગોધરા રેન્જ આઈ.જી ચિરાગ કોરડિયા તથા મહીસાગર જિલ્લા પોલીસ વડા રાકેશ બારોટ દ્વારા તારીખ 14 માર્ચ 2023થી તારીખ 28 માર્ચ 2023 સુધી ગુમ/અપહરણ થયેલા બાળકો શોધી કાઢવા માટે સ્પેશિયલ ડ્રાઇવનું આયોજન કર્યું છે. તે દરમિયાન એસ.ઓ.જી. PI એમ.વી.ભગોરાને બાતમી મળી હતી કે, સંતરામપુર પોલીસ સ્ટેશનમાં નોંધાયેલી જાણવા જોગ ગુમ થનાર સંતરામપુરની યુવતી દાહોદ જિલ્લાના ફતેપુરા તાલુકાના સુખસર ગામે રહેતી હોવાની બાતમી મળતા એસ.ઓ.જી શાખાના PSI આર.એસ.બારોટ તથા એસ.ઓ.જી સ્ટાફના માણસો દ્વારા બાતમી મુજબના ગામે જઇ તપાસ કરતા ગુમ થનાર યુવતી મળી આવતા આગળની કાર્યવાહી હાથ ધરી છે.